Ka ain kam dei ban treikam tang ia ki nongialam ka KSU
Shillong, Nailur 04 : Ka Khasi Students’ Union (KSU) kala aipor 3 sngi ia ka Sorkar ba kan kem ia baroh ki runar kiba donkti ban pynjulor kali, tih ia ka surok bad thombor ia ki paidbah ba leit ban pyrshah ia ka public hearing ka Shree Cement Ltd ha Lum Syrman, East Jaintia Hills haba pynpaw ba ka ain kam dei ban treikam tang ia ki nongialam ka KSU kata ruh ka jingkem ba khlem ki sakhi sabut kiba biang.
Ka KSU kala shim ia kane ka rai ha ka jingialang jong ka Central Executive Committee (CEC) ba long hynne ka sngi Thohdieng, kaba kren halor ki mat jingdawa bala pynsngew sha ka Sorkar bad ban pyrkhat kumno ban buddien ia kiei kiba ka Sorkar kala kular hakhmat ka seng ha ka jingialang ba long ha ka 26 tarik Nailar, 2026 ha Secretariat.
“Ka CEC kala rai ban iai buddien ia ki 5 tylli ki mat kiba ka Sorkar kala kular hakhmat ka seng ha kine ki taiew ban sa wan, khamtam ia ka felicitation centre ha Umling bad Ratacherra bad ruh ka jingpyntreikam ia ka Migrant Workmen Act kumba la iakut 20 sngi” ong ka kyrwoh na ka KSU.
Ka KSU kala pynpaw ruh ia ka jingbitar halor ka jingshah thep case ki nongialam jan man ka sngi bad khamtam eh ia ka jingshah kem u Samuel Kharbani uba dei u General Secretary ka KSU Shillong Mihngi Circle na ka jingshah khot hajir halor ka jingpyrshah ban tei mandir hapoh ka ophis ka CBI ha New Shillong.
“Ka Sorkar ka dung nadien ia ki dkhot da kaba pharep klumar bad kem bad thep case ha ka jingjia ba mih na ka jingiaid rally thuk thuk ka seng ha ka 19 tarik Nailar” ong ka KSU haba kynthoh “Kane ka pyni ia ka jingtlot bad ka jingbym ler ka tnad Pulit ba kim lah ban kem ia kiba donkti hok bad shu em kulmar ia ki dkhot ba hakhmat ka seng tang ban pynhun iano re iano khlem ki sabut ba biang”.
Ka KSU ka ong ba namar kane ka jingkhot hajir bad jingpyndik ka Sorkar ia ki dkhot ka seng, ka seng ka buh ruh ia ka jingkylli ba haba ki Pulit ki khot kumne bad pyndik kumne, hato ka tnad Pulit ka lah kem ne em tang uwei u briew uba pynjulor kali, uba tih ia ka surok paidbah bad uba donkti ha ka kam thombor ia ki paidbah ba leit sha ka public hearing ka Shree Cement Ltd ban pyrshah ia ka project tih mawshun ka kompani ba Lum Syrman, Elaka Nongkhlieh, kaba jia ha ka 20 bad 31 tarik Naitung.
“Haba ka ain ka dei ia baroh bad ym don mano mano ruh kiba long halor ka ain, balei ka noh shiliang tang ia ki dkhot ka KSU bad khlem ki sakhi sabut kiba biang kila shu kem naphang. Kane ka pyni ba ka ain ka noh shiliang haduh katta katta ba wat arbnai ruh ym pat iohi ia uwei uban shah kem na ki kam thombor ha ka public hearing” kynthoh ka KSU.
Ka KSU ka ong, halor kane, ka seng kan ym shong kli kti bad aipor ia ka Sorkar 3 sngi ban kem ia kine ki briew kiba donkti bad wat ia ki briew Sorkar ruh kiba lah ban donkti lem kumta ka KSU kan hap ban pyrkhat da kiwei pat ki lad ki lynti hadien kane ka por bala buh.
“Lada kane ka jingdawakam urlong bad lada ka Sorkar kam pyni dak pyni shin ba ki mat jingdawa kin treikam noh mar mar, ka seng kam banse ban weng noh ia ka jingpynsangeh shipor ia ka jingiakhih bala pynbna ha ka 26 tarik u Nailar bad kan bteng biang ia ki jingiakhih nangne shakhmat” ong ka kyrwoh.
Ka KSU kan buddien bad peitngor ïa ki sienjam jong ka Sorkar halor kine ki mat ha kine ki sngi bad ka seng ka pynpaw biang ba ka jingïai sngap jong ka Union kam dei ka dak jong ka jingpdiang ïa ka jingpynslem, kala ong.
“ Ka seng ka pynshai ba ka jingïakren ka don jingmut tang lada ka wanrah ïa ka jingtreikam. Ka jingïai ap jong ki paidbah bad ki samla jong ka jylla kam dei ban shim kum ka jingpdiang ïa ka jingbym treikam jong ka Sorkar” kala ong.
Ka Sorkar mynta ka dei ban jied: ka jingpyntreikam ïa ki mat jingdawa jong ki paidbah ne ka jingsdang biang ïa ka jingïakhih paidbah jong ka KSU, pynkut ka kyrwoh.
