Shillong, Nailur 04 : U National Vice President ka NPP bad Symbud Myntri Rangbah Bah Sniawbhalang Dhar ha ka sngi Thohdieng,ula ong ba ka NPP kan ym shet kylla ia ki paidbah da kaba bujli uiform sain pyrthei, hapdeng ka jingiakren ba katto katne ki MLA ki kwah ban leit iasoh BJP.
Haba kren ha ka jingialap elekshon ha Mawryngkneng, u Bah Sniawbhalang ula ong “Katto katne ki nongialam (na kiwei ki seng sain pyrthei) ki kwah ban iasoh BJP hynrei kynmaw ba ka BJP kam ju shet kylla ia u paidbah. Phi la jied ia ngi ha kane ka uniform, ngin iai sah ha kane ka uniform. Lada ngi shet kylla ia phi, ngi shet kylla ia ka Bri Hynniewtrep Hynniewskum”.
Halor ka jingkynnoh ba ka NPP ka mut BJP, ula ong “Haba ngi iatreilang bad ka BJP ka mut ba ngi iatrei na ka bynta ka roi ka par”. Ula ong ba ka party ka don la ka nongrim bad bunkam bad ki kam paidbah.
“Ngim ju kren sniew ia ki paralok ne kren bein ia ki briew” ula ong.
Haba iada ia ka pla tyngka ka Sorkar, u Bah Sniawbhalang ula kyntait ia ki jingkam ba kane ka Sorkar kala kynton da ka ram.
“Katto katne ki seng sain pyrthei ki ong ba ka Sorkar MDA ka kit ram shi rynjain, kane ka dei kaba bakla pura. Ka Sorkar kam lah ban shim ram kat kaba ka kwah, ki da don da ki kyndon bala buh” ula ong.
Halor ka kam nongialam, u Bah Sniawbhalang ula ong “Ki don ki nongialam kiba nang tang ban kren hynrei ym ler ka kam, ki don ruh ki nongialam ki bym kwah ban kren hynrei ki trei da ka kam. Ngam ju kren than, nga trei beit da ka kam, ta ka daw ki briew jong ngi kim shym la duh ia ka jingshaniah ha nga la 20 snem”.
Ula ong ruh ba ia kino kino ki jingeh dei ban pynbeit ha ka miej iakren ym ha surok.
“Ngim dei ba iakren ia ki jingeh ha surok, ngi iakren ha Iingdorbar Thaw Ain, hapoh, ha ka miej iakren, ngim dei ban ialam ia u paidbah sha surok” ula ong.
“Lada ki nongsynshar kim sngap ia ka sur jong u paidbah, ki dei ki bym pat bit ban long ki nongsynshar” ula ong.
