Shillong, Nailur 03 : Ka Meghalaya Teacher Eligibility Test (MTET) 2026, kala sakhi ia ka jingpass kaba bun eh, kaba kot palat 84% na ki kyrtong kiba pass ia ka eksam.
Ka result bala pynbna ha ka sngi Balang da ka Directorate of Education Research & Training (DERT) ka pyni ba haduh 84.03 % kiba pass ha ka Paper-I bad 85.32% ha ka Paper-II.
Na ki 21,999 ngut ki kyrtong kiba iakhun ia ka Paper-I kaba dei jong ki klas I-V, haduh 18,546 ngut kila pass.
Ia ka Paper-II na ka bynta ki klas VI-VIII, haduh 18,672 ngut kila pass na ki 21,884 ngut.
Kane ka pyni ia ka jingkiew bun shah na ka result 2025, kaba ka jingdon kiba pass ka long 63.15% ha ka Paper-I bad 64.43% ha ka Paper-II.
Ha u 2023, kiba pass ki long tang 8.11% bad 9.27 %.
Ka MTET, bala pynlong hapoh ki kyndon ka NCTE, ka dei kaba kongsan na ka bynta ban thungkam ia ki nonghikai elementary ha ki skul Sorkar.
Ka DERT kala pynlong ia kane ka eksam naduh u snem 2019. Ka eksam u snem 2026 kala long ha ka 24 tarik Naitung ha baroh 113 tylli ki jaka kiba don ha baroh ki district bad sub-division ka Jylla.
Ka Director ka DERT Kong JU Kharpuri ka ong ba ia kane ka eksam la pynlong ha ka rukom kaba khuid bad kaba shai bha.
Ka iathuh b aka Directorate kala ai ia ki MTET Guidebook 2026 ha baroh artylli ki paper bad ki jingai jinghikai lyngba ka YouTube halor ka jingpyndap ia ki OMR sheet ban iarap ia ki kyrtong, khamtam ki nonghikai ba dang don ha ka kam kiba la ai ka jingshakri la bun snem.
Ka Director ka pyntip ba ka DERT ka thmu ban pynlong s alai tylli ki eksam MTET-la kumno kumno ruh ha u Kyllalyngkot 2027, Nailur 2027 bad Lber 2028- hashuwa ka por bala buh da ka Supreme Court, ban ai ka lad ia kito kiba kwah ban pass.
Ki kyrtong ki lah ban peit ia ka result ha ka www.megeducation.gov.in.
