Shillong, Nailar 27: U MP ka Rajya Sabha James K Sangma u la kular ban ai jingkyrshan T.20 lak na ka bynta ban pynbha bad pynitynnad iaka Aitnar kaba don ha Mukhla ha ka por ba u leit sha ka lehniam Behdeiñkhlam.
Haba jubab ia ka Dorkhas ba la aiti da ka Seiñraij Mukhla, u James u la ong ba ia kane ka pisa yn pynbiang na ka bynta ban pynbha ia ki sawdong sawkun jong ka Aitnar, ha kaba ki jingleh niam Behdienkhlam man la u snem ka khring bun bha ki paidbah.
“Nga sngewnguh ia ki paidbah ka Seiñraij Mukhla bad ki shnong ba marjan kiba la lah ban pynlong ia kane ka leh niam Behdienkhlam bad ban pynneh pynsah ia ka kolshor kaba riewspah. Kane ka long namar ka jingtrei shitom lang jong phi,” la ong u James.
U James ula ong ba ka Behdeiñkhlam ka la nangroi naka por shaka por bad palat ia ka jingthmu tynrai jong ka ha ka rukom leh niam.
“Katba ka Behdeiñkhlam ha kaba sdang ka la sdang da ka jingthmu ban beh noh ïa ki khlam, ki jingpang bad ki jingsniew ha ka imlang sahlang, hynrei mynta ka la kylla long ka dak kaba khlaiñ jong ka jingïatylli ha ka imlang sahlang” u la ong.
Haba kyntu ia ki samla ban iada ia ka pateng, u la bynrap, “Iada bad pynneh pynsah ia ka kolshor bad ki riti dustur jong phi, ki tynrai jong ka jinglong briew, da kaba pynthikna ba kin iaid sha ki pateng ban wan.”
Ha kane ka sngi la wan ban ïashimbynta da u Myntri ka tnat ka Koit ka Khiah u badei ruh u MLA ka thaiñ u Bah Wailadmiki Shylla, ki heh Sorkar, ki nongïalam niam bad ki nongmihkhmat na ki kynhun Seiñraij bapher bapher.
Ha ka sngi pynkut, ki dkhot ka Seiñraij Mukhla ki la pyni ïa ki jingshad tynrai bad wanrah ïa ki ‘rots’ (tableaux) ba bun rong kiba kit ïa ki khubor imlang sahlang sha ka Aitnar.
