Shillong, Nailar 26 : Ka Kynhun Myntri ka Sorkar Jylla ha ka sngi Balang kala rai ban pynkut noh ia ka jingshim interview ha ka thungkam Group-C non-technical hapoh ki District Selection Committee (DSC) ka ban treikam naduh ka 1 tarik Kyllalyngkot, 2027.
U Myntri Rangbah Conrad K Sangma ula ong ba kane ka sienjam ka dei shibynta jong ka jingpynkylla thymmai ia ka thungkam thungkam ba dang pyniaid ka Sorkar mynta.
“Ka dei ka jingpynbteng ia ki jingpynkylla thymmai kaba ngi la sdang. Kham hashuwa, halor ka jingai jingmut jong ka UPSC bad ka Reform Commission ka Jylla, ngi la pynkut ia ka interview jong ki kam Group-D ha ki DSC. Mynta ka sngi, ngi la pynkut sa ka interview na ka bynta ki kam Group-C non-technical” ong u Conrad hadien ba dep pyniaid ia ka jingialang.
U ong ba ki kam technical hapoh ka Group-C kin dang bteng ban don ka interview bad ka Tnad Personnel kan sa pynmih ia ka jingpynbna ia ka thup jong ki kam bala bynta kum ki technical bad non technical.
U Conrad u ong ba ka Sorkar kan sa shim kumba 3-4 bnai ban pynkylla ia ka service rules ha ka ban pyntreikam ia kane ka rai.
“Ki jingpynbna lait kam ba pynmih naduh ka 1 tarik Kyllalyngkot, 2027 shakhmat kin nym don shuh ia ka interview na ka bynta ki kam Group-C non-technical” ula ong.
Ka Kynhun Myntri kala ai jingmynjur ruh ia ka Standard Operating Procedure (SOP) na ka bynta ki District Selection Committee (DSC) ba kin pynbeit ryntih ia ka thungkam thungjam.
“Ki DSC kiba treikam ha baroh ki district bad kiba leh ia bun ki kam, don ki khep ba kim don ia ki kyndon thungkam ba donkam. Ban tehlakam ia kane, ka Kynhun Myntri kala mynjur ia ka SOP ka ban bud da baroh ki DSC” ula ong.
U bynrap ba kan sa don ka jingai jinghikai na ka bynta ki Deputy Commissioner bad ki Ophisar ha kaban lah pyntreikam kham kloi ia ki SOP, kaba hadien yn sa pyntreikam lang sha kiwei pat ki recruitment board, kynthup ka medical, rural development bad police.
 ka ban treikam naduh ka 1 tarik Kyllalyngkot, 2027.){kind=link}