Haduh 97 % lah dep pyntrei ia ka surok Rongjeng-Mangsang-Adokgre hadien 9 snem

Ka bynta ba sah yn pyntrei hapoh ka project World Bank : DyCM

Shillong, Nailar 26 : U Symbud Myntri Rangbah ka tnad PWD (Roads) Bah Prestone Tynsong ha ka sngi Balang ula pyntip ba haduh 97% lah dep ban pyntrei ia ka surok Rongjeng-Mangsang-Adokgre (RMA) ba dang iaid mynta hapoh ka Non-Lapsable Central Pool of Resources (NLCPR).

Haba jubab ia ka jingkylli bala wanrah da u MLA ka Rongjeng Jim M Sangma halor ka jingslem ban pyntrei ia kane ka project ba kongsan kaba la mang naduh u 2017, u Bah Prestone ula ong ba ka por ba buh ban pyndep ia ka project ka long 24 bnai hadien bala aiti ia ka work order ba khatduh.

“Ka Sorkar kala rai ban kynthup ia ka project hapoh ka World Bank Project” ula ong.

Haba jubab ia ka jingkylli u Nongialam ka Liang Pyrshah Mukul Sangma halor ka jingpynduna ia ka mang tyngka, u Bah Prestone ula ong ba ia ki jingpynkylla la leh da ka DoNER ministry.

Ula pyntip ba haba sdang, ka mang tyngka bala buh da ka DoNER ka long T.210 klur kaba dei ban bei da ka Ministry bad ka NEC. Hynrei, ka jingai jingmynjur kine ki bor treikam kala wan tang T.123.28 klur.

“Na ka liang jong ngi ka jingkylli kam mih satia ba ngi pynduna. Ka rai ka dei kaba shim da ka Ministry. Haba ngi ioh ia ka final AA, ka DPR kaba la pynkhreh haba sdang kaba long T.210 klur lah hap ban pynthymmai kat kum ka AA. Kam dei ka Sorkar ka pyntymmai dalade” ong u Bah Prestone.

Haba kylli halor ka jingiar ka surok bad ka DPR ba pynthymmai, u Bah Prestone ula ong ba kane ka project ka dei ka surok intermediate lane ka jinglut ka long T.123.28 klur.

U pynshai ba ka jingpynduna ha ka DPR haba iadei bad ka jingjrong, ym ka jingiar, ka long na ka 28 Km sha ka 22 Km.