Shillong, Nailar 25 : Ka long ka khubor ba bha ia ki samla pule ba ka Sorkar Jylla kan sa pynlait noh ia ka T.93 klur hapoh ka Umbrella Scholarship scheme na ka bynta ki samla pule Scheduled Tribe ha ka 27 tarik Nailar.
Haba pynbna ia kane ha ka sngi Ba-ar, u Myntri Rangbah Conrad K Sangma ula ong ba palat 96,000 ngut ki samla pule kin ioh ia kane ka pisa.
“Nga don ia ka khubor kaba bha khamtam ia ki samla pule. Ha ka 27 tarik Nailar, kaba dei lashisngi, ngin sa pynlait noh ia ka Umbrella Scholarship sha ki samla pule ST jong ngi” ong u Conrad.
U iathuh ba ka pisa ka kynthup ia 40% jong ka scholarship baroh lang, katba ia ka 60% ba sah yn sa nang buddie bad ka Tribal Affairs Ministry ka Sorkar Pdeng.
“Palat 96,000 ki samla pule kin ioh kumba T.93 klur ka scholarship ka ban long 40% na ka pisa baroh lang. Kaba sah 60% yn sa iakren bad ka Tribal Affairs Ministry ka Sorkar India bad ngi kyrmen ban gin sa ioh noh shen ia ka” bynrap u CM.
