Shillong, Nailar 21 : Ka bor district ka Ri-Bhoi kala khang pyrshah ia ka jingdie petrol ha ki bilor ne ki jyrkin hapoh ka district baroh kawei haba pynpaw ia ka jingsngewkhia ba ki runar ki lah ban pyndonkam bakla da kaba shna ia ki petrol bomb ban leh ia ki kam pyntriem.
Ka hukum, bala pynmih da u Deputy Commissioner Dr Abhishek Saini ha ka 20 tarkk Nailar hapoh ka kyndon 163 jong ka Bharatiya Nagarik Suraksha Sanhita (BNSS), kala mih ha ka por ba jur ka jingsynjor ka suk ka sain ha Jylla, da ka jingjia kam thombor ha ka rally thuk thuk ka Khasi Students Union (KSU), kaba la pynpur ruh ia ki jingiakynad wat shaduh ki jaka khappud ka Meghalaya-Assam.
Ka bor district ka pyntip ba kala ioh ia ki jingtip ba thikna bad ki khubor halor ka jingbuh jingma jong ki riew runar, lane ki nongiakhih ba kin thied ia ki petrol, diesel ha ki bilor, ki song plastic bad ki jerkin.
Ka hukum ka khang ia baroh ki trai petrol pump, ki manager, ki franchisee bad ki nongtrei ki fuel station ha Ri-Bhoi ba kin die ia ki umphniang ha kino kino ki kynja song ba kynthup ia ka bilor plastic ne bitor, ki jyrkin, ki drum bad kiwei kiwei, kiba lah ban kit ban rong kat shaba leit.
Ka ong ba ia ka petrol bad diesel dei ban die beit beit tang sha ki kali ba kin pyndap ha ki tanky kiba pyndait hapoh ka kali.
Hynrei kala shah pat da u pud ban die na ka bynta ban pyndonkam ha ka jingpynmeh ia ki generator ba don ha ki jaka sumar lane ki mobile tower, hynrei la buh kyndon ba ka jingdie ka dei ban long tang ha ki container nar bala ai jingmynjur.
Ka bor district kala pyndonkam ruh ia ka jingkhmihbniah kaba pyrrkhing bha ia ki fuel station bad bthah ba ki dei ban buh ia ka register ka ban thoh kyrteng ia ki nongthied, jaka sah, ki mobile nombor bala pynshisha, Aadhaar lane ID ka Sorkar, ka nombor kali, ka jingsoi kyrteng u nongthied bad kiwei kiwei.
Baroh ki fuel station ki dei ban pynthikna ba ki kor CCTV ki treikam baroh arphew saw kynta.
Ka ong ba ki trai petrol pump, ki nongtrei bad ki nongthied kiba pynkhein ia ka hukum ki lah ban ngat ha ka jingshah pynshitom hapoh ka kyndon 223 jong ka Bharaita Nyaya Sanhita.
