Shillong, Nailar 20 : Ka Tnad Pulit ka Jylla kala register haduh 15 tylli ki ejahar namar ki kam thombor ha ka rally thuk thuk jong ka KSU ha ka sngi Balang, kaba lam sha ka jingjulor haduh 31 tylli ki kali, mynsaw 16 ngut ki briew bad artylli ki kali ba shah thang, ong u Superintendent of Police ka East Khasi Hills Bah Vivek Syiem.
Une u Heh Pulit u pyntip ba ki Pulit kila pynlong ruh ia ka jingthwet kaba jur ia ki briew kiba leh ia ki kam thombor ha kane ka rally.
Lai ngut ki nongialam ba hakhmat ka KSU kiba pynbeit ia kane ka rally, kila shah kem na ka restaurant ha Shillong bad la phah set ia ki hapoh ka Judicial Custody ba 14 sngi, ong u Bah Vivek.
“Ha ki kam thombor hynnin ka sngi, kumba 31 tylli ki kali kila shah pynjulor bad 16 ngut ki briew kila mynsaw bad artylli ki kali kila shah thang. Kumba 15 tylli ki ejahar lah ioh ban pdiang haduh mynta. Ka jingtohkit kala iaid shakhmat halor kiwei pat ki case ban pynithuh ia mki briew kiba leh ia kine ki kam thombor bad thang kali” ula ong.
U SP ula pyntip ba ia kane ka rally la khmih lynti ba kan long kaba jai jai hadien bala ai ia ka jingbit ryngkat ki kyndon.
“Ka KSU kala pan ia ka jingbit bad la buh ruh ia ki kyndon. Ngi ngeit ba kan long ka rally kaba jai jai, kumta ngi la buh ia ki Pulit tang ha ki jaka ba donkam. Hynrei kam shym la long kumba la khmih lynti bad kala mih pynban ka jingthombor” ula ong.
U Bah Vivek u pyntip ba ki Pulit kila don bun bah ki video bad ki sakhi halor kane ka jingjia.
“Ngi la don bun ki sakhi bad ki video ban pyni ba ki nongshong thuk thuk kila donkti ha ki kam thang kali, pynjulor kali bad shoh ia ki briew. Kumba 200 tylli ki thuk thuk kila mih ha kane ka rally. Ngi hap ban pynithuh mano na kine ki briew kiba donkti ha ki kam thombor kiba jia” ong u Bah Vivek.
U pyntip ba ia ka MMPO la pyntreikam mynta ha ryngkat ki kyndon ba lum paidbah beain, shoh briew bad pyntieng pynsmiej.
Halor ka jingkynnoh ba pyndonkam palat pud ia ka bor ha ka jingkhynra ia ka Ophis ka KSU ha Jaiaw, u Bah Vivek ula pynshai ba ki Pulit kila leit ban kem shuh shuh ia ki briew ba donkti ha ki jingthombor bad mad pynban ia ka jingialeh pyrshah.
“Ki Pulit kila shah kawang petrol bomb, kumta ban pynsaphriang ia ki paidbah ngi hap ban siat ia ki stun grenade. Kam don satia hapoh kano kano ka iing paidbah ne shimet, hynrei tang ban pynpra ia u paidbah. Hadien ba ki nongialam shnong kila kyrpad, ki Pulit kila wan phai noh” ula ong.
U pyntip ba san pyrton ki bor pahara ka Sorkar pdeng kila wan poi bad yn sa buh pahara ia ki naduh ka miet sngi Palei. U pyntip ba haduh mynta ym pat don shuh kano kano ka kam wiang ding naduh ki artylli ki jingjia ba jia hynnin ka miet ha Mawlai bad Nongmensong.
