Shillong, Nailar 20 : Shisngi hadien ba ki kali Sorkar kila shah thang ha ka por ba iaid rally thuk thuk ka KSU kaba la lam sha ki kam thombor, ka Sorkar Jylla kala pyrrkhing bha ia ki kyndon jingshngain na ka bynta ka jingpyndonkam ia baroh ki kali Sorkar.
Ka tnad Secretariat Administration, ha ka Office Order ba pynmih ha ka sngi Balang, kala bthah ia baroh ki Myntry Sorkar, ki Nongaibuit, ki Chairmen bad Ophisar kiba la ioh pyndonkam ia ki kali sorkar ba kin pynthikna ia ka jingshngain jong ki, haba kren shai ba dei ban bud ia ki jingbthah khlem da pynkylla.
Ka Sorkar kala bthah ba ia ki kali Sorkar dei ban pynieng tang ha ki jaka bala buh kyrpang hapoh ka Secretariat lane ha kino kino ki jaka bala mynjur kyrpang da ki bor ba dei khmih, bad la maham ban shu ieh ia ki ha ki jaka paidbah, khamtam ha ka por miet.
Ia ki kali kiba buh ha ki Iingsah jong ki Ophisar shimet, ka hukum ka ong, ba kine ki Ophisar ki dei ban pynthikna ba la pynieng ia ki ha ki jaka kiba don jingiada na ki jingshah tuh bad shah pynjulor.
Kala maham ruh ia ki nongniah kali ba kim dei ban ieh ia u shabi kali hapoh ka kali lane aiti ia ki sha ki briew kiba khlem iohbor, bad ban buh ia ki kynja ba kem ding, ki klong umphniang lane kino kino ki mar kiba ktah hapoh ka kali.
La bthah ia ki nongniah ba kin peit bad talasi bha ia ki kali hashuwa ban ieh ia ka kali ha ka por miet, ban pynthikna bala khang bha u shabi, ki jingkhang iit bad ba ym dei ban ieh ia ki mar ba shongdor lane ki kot ki sla ka Sorkar hapoh ka kali.
Kala ong ruh ba kano kano ka jingjulor, jingpyrshang tuh lane pyndonkam khlem da ioh jingbit, dei ban pyntip mar mar bad lada jia ba jah, shah tuh ne shah pynjulor, dei ban ujor mar mar sha ki Pulit khlem ka jingpynslem.
Ka hukum, bala pynmih da u Secretary Swapnil tembe ka ong ruh ba lada don kano kano ka jingjia k aba sngewsih, dei ban pyntip mar mar ia kane sha ka Police Control Room.
