Shillong, Nailar 20 : U MDC ka VPP na Mawkhar-Pynthorumkhrah bad Chairman ka KHADC Bah Strong Pillar Kharjana, ula ai ka jingiaroh ia u Myntri Rangbah Conrad K Sangma bad Symbud Myntri Rangbah Bah Sniawbhalang Dhar namar ka jing shimkhia mardor ban tuklar ha kaban pynjai jai ia ka jinglong jingman kaba mih na ka jingkhynra jong ki Pulit ia ka Ophis ka Khasi Students Union (KSU) ha ka miet sngi Balang ha Jaiaw.
U Bah Strong ula ong ba ka jingtuklar ba mardor da u Myntri Rangbah bad Symbud Myntri Rangbah, kala iarap ban tehlakam ia ka jinglong jingman ba kan nang heh.
Kane ka jingkhynra kala jia hadien ba ka rally thuk thuk ka KSU kala pynmih ia ka huri hura ha ka sngi Balang, kaba la pynbor ia ki Pulit ban leit khynra ia ka Ophis ka KSU bad kem ia ki nongialam, kaba lam sha ka jingiapyni bor hapdeng ki Pulit bad ki dkhot ka KSU.
Ki Pulit kila pyndonkam da ki tyndong lyer pynsat khmat ha kane ka jingialeh bad la pyntip ruh ba kila don ki iing ba don marjan ka Ophis ka KSU, kiba la julor.
Kane ka jinglong jingman kala nang heh haba ka Seng Samla Jaiaw Pyllun kala mih ban tuklar bad beh ia ki Pulit na ka thain, kaba la khang lad ia ki Pulit ban pynbteng ia ka jingkhynra.
U bah Strong u pyntip ba ula phone beit beit ia u Myntri Rangbah bad u Symbud Myntri Rangbah katba ka jinglong jingman ka dang khluit. Kat kum ka jingong jong u, ka jingshimkhia jong ki, kala iarap ban tem ia ka huri hura bad tehlakam ia ka hashuwa ba kan nang klang.
Une u MDC ula ai ka jingkhublei ia ki nongialam ka Sorkar kiba la iarap ban wanrah pat ia ka jinglong ba jai jai ha ka thain.
 ha ka miet sngi Balang ha Jaiaw.){kind=link}