Shillong, Nailar 19 : Ki Pulit ka Jylla kila hiar khynra bad syrtap ia ka Ophis ka Khasi Students’ Union (KSU) ha ka miet sngi Balang da ka jingthmu ban kem ia ki nongialam bad ki dkhot kiba don hapoh ka Ophis ha Jaiaw Pdeng.
Ka kynhun ki Pulit kynthup ki SF-10 kila syrtap ia ka Ophis ka KSU ha ka por kumba 11:30 baje eiei ban khynra naphang ia ki briew kiba don hapoh kane ka Ophis.
Kane ka jingwan khynra kynsan kynsan ki Pulit kala pynbitar ia ki nongshongshnong ka thain, kiba la iamih paidbah ban ieng pyrshah bad beh krad ia ki Pulit na kane ka jaka.
Ha kane ka jingkhynra, kala mih ruh ka jingsiat tyndong lyer pynsat khmat ban beh ia ki paidbah ba kin ym wan tur.
Kat haduh ba thoh ia kane ka khubor, ym pat lah ban tip la ki Pulit kila kem briew biang ne em na kane ka jingkhynra.
Ia ka khubor kaba bniah yn sa pynmih kham hadien.
