Kynnoh ka UDP ia ka KHADC ba leh kiar ia ki Hima hapdeng ka kynrum kynram ka Hima Langrin

Shillong, Nailar 20 : Ka United Democratic Party (UDP) ha ka sngi Balang kala ther tyngeh ia ka Executive Committee ka KHADC ba ialam da ka VPP, namar ka jingsngap jar ia ka kynrum kynram hapoh ka Hima Langrin bad kyntu ia u CEM bad EM ba kin tuklar bad pynbeit ia kane ka kam shuwa ba kan ktah ia ka Council.

Kane ka jingkynthoh kala mih na u Nongialam ka UDP bad Nongialam ka Liang Pyrshah ha KHADC Bah Titosstarwell Chyne hadien ka jingwan tur paidbah biang ki khun ki hajar ka Hima Langrin sha KHADC ban dawa weng mardor ia u Nangtei Sing Syiem kum u Syiem ka Hima Langrin.

Ia kane ka jingiakhih la pynlong hadien ba kut ka jingaipor ba 15 sngi da ki khun ki hajar ka Hima ia ka Council ba kan pyntreikam ia ki jingdawa jong ki.

“Nga iohi haki social media ba ki khun ki hajar ka Hima Langrin kila wan tur biang, hynrei nga tip pat ia ka daw. Hynrei, na kaei kaba nga iohi na ki khubor, ka dei namar ki khun ki hajar kim sngewtynnad ia ka jingthung biang ia ujuh u Syiem bad ka Hima Langrin baroh kawei” ong u Bah Titos.

Haba kynthoh ia ka Executive Committee, une u nongialam ka UDP ula ong ba ka long kaba sngewsih ba ki paidbah kin hap ban wan shaduh sha Council ban dawa ia ka jingkwah jong ki.

“Nga ka liang ka jong nga, Nga sngew ba ka long kaba sngewsih ba ki paidbah kin hap ban wan shaduh sha Council. Bad na ka liang ka EC, kala dei ban dep pynbeit ia kane ka kam hapdeng ki nongialam na baroh arliang ban wanrah pat ia ka jingiasuk hapdeng jong ki” ula ong.

U Bah Titos ula maham ba ka jingbym leh eiei ka Council ka lah ban pyntlot shuh shuh ia ki bor synshar nala tynrai ka Jylla.

“Lada kane ka dang iai bteng, kan sa ktah jur bha ia ka District Council, khamtam naba ka Council dalade ka dei ha ka jingshisha ban bat bad pynkhlain ia ki bor synshar nala tynrai” ula ong.

Une u Nongialam ka Liang Pyrshah ula dawa ia u CEM bad EM ba kin shim ia ka jingkitkhlieh bad ba kin iakren bad ki paidbah ka Hima.