Wan ka miej iakren, kloi ka Sorkar ban iakynduh, ong u Myntri ia ka KSU

Shillong, Nailar 19: U Myntri Sorkar bad nongaiktien ka Sorkar MDA Bah Wailadmiki Shylla u la kyrpad ia ka Khasi Students’ Union (KSU) ban wan sha ka meij iakren da kaba pynskhem ba ka Sorkar ka long kaba la pynkhreh ban sngap bad pynbeit ia ki jingeh bad ki jingdawa lyngba ka jingiakren.

Haba kren sha ki lad pathai khubor halor ka jingiakhih jong ka KSU, u Bah Wailad u la ong ba ka Sorkar Jylla ka plie iaki lad ban iakren halor baroh ki mat ba ka seng ka la pynpaw.
“Hooid, thikna ngi la pynkhreh ban iakren. Nga kwah ban pynpaw ba ka Sorkar ka plie iaki lad ban iakren. Ngi la pynkhreh ban sngap” ula ong.

“Nga tharai baka jingiakren kadei ka lad bad ka lynti ban iaid shakhmat. Kumta nga kyrpad bad kyntu ia ka KSU ba kan wan ban ia kren bad ka Sorkar,” ula bynrap.

Ka KSU ka la pynpaw 5 tylli ki mat sha ka Sorkar da kaba dawa ban pyntreikam mardor.

Ka jingdawa ba kongsan ka ïadei bad ka Public Hearing kaba la long haka 31 tarik Naitung 2026 na ka bynta ka Shree Cement ha East Jaiñtia Hills, kaba ka seng ka la kynnoh ba iaka Public Hearing la leh daka bor namar khlem shah iaki ba pyrshah ban wan ïashimbynta.

Ha kaba iadei bad kane, ka KSU ka la dawa ban shim daki sienjam ba tyngeh pyrshah ia u Deputy Commissioner, Superintendent of Police, ki heh pulit bad ki ophisar jong ka Meghalaya State Pollution Control Board, ha ryngkat ka jingpynshitom ia kito kiba shah kynnoh ba ki khanglad ia ki ba pyrshah ban leit ïashimbynta.

Ka seng ka la dawa ruh ban pyntreikam pura ïa ka Meghalaya Residents Safety and Security Act, 2016 tad haduh ban da buh ban da ioh pyntreikam iaka Inner Line Permit system.

Ka ka dawa ban buh ia ki khyrdop (facilitation centre) ha baroh ki 18 tylli ki entry point ha Khasi bad Jaintia Hills bad ia ka jingpynshisha jong ka jingwan rung ki bar Jylla dei ban leh tang da ki Dorbar Shnong.

Kiwei pat ki jingdawa ki kynthup ban pyntreikam noh mardor ïa ka aiñ Migrant Workmen Act, 2020, ki jingpynkylla ha ka thungkam ha NEIGRIHMS kata daka ba pyntreikam 80:20 female-to-male haba thungkam Nurse, ka jingbhah kyrpang ïa ki Khasi, Jaiñtia bad Garos, bad ban weng noh ïa ki Interview na ka bynta ki kam haka thup B, C and D nalor ka jingwanrah daka Standard Operating Procedures ha baroh ki Board thungkam.