Shillong, Nailar 18 : Ka Kynhun Myntri ka Sorkar ha ka sngi Balang kala ai jingmynjur ia hynriew tylli ki Bill ba iadei bad ka tnad Pule Puthi, ba kynthup ia lai tylli ki amendment, artylli ki jingtyrwa ia ki University shimet ba thymmai bad kawei ka jingpynduh noh ia ka University (repeal).
Haba kren sha ki nongthoh khubor hadien ka jingialang bala pyniaid da u Myntri Rangbah Conrad K Sangma, u nongaiktien ka Sorkar MDA bad Myntri Sorkar Bah Wailadmiki Shylla ula iathuh ba baroh ki mat bala wanrah hapoh ka Kynhun Myntri ki dei na ka Tnad Pule Puthi.
“Mynta ka sngi ngi la iakren ia hynriew tylli ki mat bad baroh kine ki mat ki wan na ka Tnad Pule Puthi. Kiba bun ki deiki Bill- lai tylli ki amendment, artylli ki bill thymmai ban sa wanrah hapoh ka Iingdorbar bad kawei ka dei ka bill ban pynduh noh (repeal)” ong u Bah Wailad.
U iathuh ba ka Kynhun Myntri kala mynjur ia ka Maharashtra Institute of Technology, Meghalaya (Amendment) Bill, 2026 ban wanrah ia ka kat kum ki kyndon ka UGC.
Kat kum ka jingong jong u, ka original act ka shah ia ka sponsoring body ban rai ia u Visitor, hynrei ka amendment ka buh ba u Lat ka Jylla u dei ban long u Visitor, kumba long kiwei ki University hapoh ka Jylla.
Ka Bill ka tyrwa ruh ban pynbun ia ka jingdon nongmihkhmat na ka Sorkar ha ka Board of Management na uwei sha ki arngut bad ha ka Board of Governors na uwei sha ka lai ngut.
Kum kane ka amendment la mynjur ruh na ka bynta ka Mahatma Gandhi University (Amendment) Bill, 2026.
U Bah Wailad u iathuh ba baroh kine ki jaka pule kila bud mynshuwa ia ka kyndon ha ka ba ia u Visitor la rai da ka sponsoring body, bad ka amendment kala pynbeit ia kane haba pynbun ruh ia ki nongmihkhmat na ka Sorkar ha ki governing body.
Ka Kynhun Myntri kala mynjur ruh ia ka Martin Luther Christian University (Amendment) Bill, 2026.
U Bah Wailad u iathuh ba ka amendment ka khang ia ka University ban treikam tang hapoh ka Jylla Meghalaya, haba weng noh ia ka kyndon ban leh ia ka distance education ka bym shah satia ia ki university shimet.
Ka amendment kala pynduh noh ruh ia ka bor ban pyniasoh ia ki college, ka bym shym la shah satia hapoh ki kyndon ka UGC.
Ka Kynhun Myntri kala ai jingmynjur ruh ia artylli ki Bill jong ki University ba thymmai.
Ka Sister Nivedita University, Meghalaya Bill, 2026 ka tyrwa ban buh ia ka university ha Byrnihat katba ka Khasi Jaintia Presbyterian University, Meghalaya Bill, 2026 ka tyrwa ban buh ia ka university ha Sohiong.
Ka mat ba mynjur khatduh ka dei ka International Open University (Repeal) Bill.
U Bah Waulad u iathuh ba ia ka Act la mynjur da ka Iingdorbar Thain Ain ha u snem 2011 hynrei kala shu sahkut khlem treikam tad haduh u snem 2022.
“Ha u 2022, kila don ki briew kiba wan shakhmat ryngkat bad ka power of attorney, hynrei hadien ngi la ioh jingtip ba ka don ka jingiakajia” ula ong.
Kumta u ong ba ka Kynhun Myntri kala rai ban pynduh noh ia ka Act naba ka kyrteng kala pynkhein ia ka kyndon UGC.
“Lada phi peit ia ka kyrteng, ka dei “International Open Univerity’. Ka kyntien ‘Internatonal’ ka don, bad “Open University’ ruh ka don lang, ka bym shym la shah kat kum ki kyndon ka UGC. Kumta, ka Kynhun Myntri ka sngew ba kan bha shibun ban kiar ia kano kano ka jingeh ki ban mih hadien habud. Ta ka daw ngi la pynduh pynsam noh ia ka Act”.
Ia baroh kine ki hynriew tylli ki Bill yn sa wanrah ha ka Dorbar Synrai ban wan jong ka Iingdorbar Thaw Ain ka Jylla.
.){kind=link}