Shillong, Nailar 19 : Ki dkhot ka Khasi Students’ Union (KSU) kila pynlong ia ka jingiakhih ba shipor ha Main Secretariat ha ka sngi Balang da kaba wah ia ki banner ba pynpaw ia ka jingpyrshah halor ka jingbym leh eiei ka Sorkar ia ki 5 tylli ki mat dawa ka seng.
Ki Pulit kila weng ia kine ki banner tang da ki minit bad kila pynkhlain ruh ia ki bor pahara ha sawdong ka Secretariat.
Kane ka jingiakhih kala wan jia tang da ki kynta shuwa ka bike rally ban rah lama iong jong ka KSU na Jaiaw.
Ki banner kila kynnoh ia ka Sorkar ba jied briew lajong bad bam sap ha ka thungkam thungjam bad dawa ia ka jingthungkam kaba khuid bad ba shai.
“Ngi la pule shitom, ngi la pass hynrei haba kut ka sngi, ia ki kam la ai tang sha kito kiba lah ban thong pisa” ong kawei ka banner.
Ha ka 17 bad 18 tarik Nailar, ka KSU kala pynlong ia ki jingialang paidbah ha kylleng ka sor Shillong hadien ka jingaipor ba 15 sngi ia ka Sorkar.
U General Secretary ka KSU samla Reuben Najiar ula ong ba ki jingdawa ba hakhmat eh ki kynthup ia ka jingkhein iap ia ka public hearing ka Shree Cement ba long ha ka 31 tarik Naitung 2026 ha East Jaintia Hills, ia kaba ka seng ka kynnoh ba ka dei ka kam kaba la don ka jingiapynbeit lypa.
Ka KSU kala dawa ban leh eiei pyrshah ia u DC, SP, ki Heh Pulit bad ki Heh ka MSPCB, bad ban pynshitom ruh pyrshah ia kito kiba kynnoh khang ia ki paidbah ban leit sha ka hearing.
Kiwei pat ki jingdawa ki dei ka jingpyntreikam pura ia ka Meghalaya Residents Safety and Security Act, 2016 tad haduh ban da pyntreikam ia ka ILP, da ka jingbuh ia ki Facilitation Centres ha baroh ki 18 tylli ki entry points ha Khasi bad Jaintia Hills bad pynshisha da ki Dorbar Shnong.
Ka KSU ka kwah ruh ban pyntreikam mardor ia ka amendment jong ka Migrant Workmen Act, 2020, jingpynkylla ia ka thungkam thungjam ha NEIGRIHMS kynthup ka 80:20 ratio jong ki nos kynthei bad shynrang bad ka jingai bhah ka thikna ia ki Khasi, Jaintia bad Garos, bad weng noh ia ki interview jong ki kam Grade B, C bad D nalor ban don ki SOP na ka bynta ki Recruitment Board baroh.
Ka KSU kala kyntu ia ki paidbah ba kin iasnohkti ha kane ka campaign bad ki jingialang.
