Shillong, Nailar 18 : U Chief Electoral Officer (CEO) ka Jylla Dr BDR Tiwari ula pyntip ba palat 6.5 lak ngut ki nongthep vote ka Jylla kin dang don hapdeng ka jingpynshisha kum shibynta jong ka Special Intensive Revision (SIR) 2026, haba pyntip ruh ba ki hearing kila iaid mynta ha ki District.
Ha ka jingialang bishar kam online bad ki Deputy Commissioner, ki ERO bad AERO ha ka sngi Nyngkong, u CEO ula iathuh ba ia ki notice lah dep ban pynkhreh bad ai sha ki nongthep vote ki bym lah ban pyniadei ia ki kot ki sla bad ka electoral roll 2005 lane don ki jingduna ha ka jinglum jingkhein.
Haduh 6,51,644 ngut lah dei ban ithuh, kynthup 2,22,786 ki nongthep vote ba khlem lah ban shem bad 4,28,858 ki bym iahap ki kot ki sla.
U CEO ula bthah iaki bor district ban pynthikna ba kine ki notice kin poi sha ki nongthep vote ha ka por kaba biang bad ba la pynbeit ha ka rukom kaba dei ia ka hearing khnang ba baroh kin ioh ia ka lad ban wan mih hakhmat ki ERO lane AERO ryngkat ki kot ki sla ban kyrshan.
Ha ka jingialang ba ju long man ka taiew bad ki nongmihkhmat na ki seng sain pyrthei, u CEP ula shong bishar ia ka jingtreikam ki Booth Level Agents bala thung ban iarap ia ki nongthep vote. Haduh mynta, 1810 ngut ki BLA kila treikam bad kiba bun eh ki dei na ka NPP, BJP bad VPP.
Ka jingialang kala khmih bniah ruh ia ka jingpynbeit ban leh eiei halor ki jingud jingnam. Ki nongthep vte ki lah ban kren sha kiba dei khmih lyngba u helpline 1950, ki mobile number lane book ia ka call bad la ki BLO lyngba ka ECINET app.
Ban pynneh ia ka jingtreikam kaba shai, ia ka thup jong ki jingkam bad jingujor bala pyndap ha ka form 6,7 bad 8 lah thep man la por ha ka website u CEO ka Meghalaya. Nava ia ka draft roll lah dep ban pynmih, 4091 tylli ki aplikeshon kila wan ban pynrung kyrteng lang, ban weng bad pynbeit lane pynkynriah jaka.
Ki Electoral Roll Observers kila leit mynta sha ki district ban khmih bniah ba kumno la phah ia ki notice, kumno lah pyniaid ia ki hearing bad kumnp ia ki jingkam lah pynbeit. La bthah ia ki bor district ba kin buh bha ia ki kot ki sla bad pynthikna ba kane ka kam ka iaid khlem ka jingpynslem.
Ula ong ba kito kiba ioh ia ka hearing notice kim dei ban kdat sharud ia ka bad ki dei ban leit mih ryngkat ki kot ki sla kiba donkam.
Ka Ophis ka pynshai ba kan nym don satia ka jingweng kyrteng khlem da phah notice bad ai ka lad ban sngap ia ki.
 ka Jylla Dr BDR Tiwari ula pyntip ba palat 6.5 lak ngut ki nongthep vote ka Jylla kin dang don hapdeng ka jingpynshisha kum shibynta jong ka Special Intensive Revision (SIR) 2026, haba pyntip ruh ba ki hearing kila iaid mynta ha ki District.){kind=link}