Shillong, Nailar 17: Ka Sorkar Meghalaya kala pynbna ban ai ia ka Ex-gratia Assistance kaba mar T.2 lak sha ki bahaiing bahasem jong ki 5 ngut kiba na ka Jylla Meghalaya kiba la khlad noh ha ka jingpluh ding kaba shyrkhei ha ka Hotel Bideshini Yatri Nibas ha Tarapith, Birbhum district, jongka West Bengal, hynne dang step phyrngab jong ka Sngi Nyngkong.
U Myntri Rangbah ka Jylla u Conrad K. Sangma hynne ka sngi ula pynpaw ia ka jingsngewlem bad ka jingkyndit halor ka jingjia kaba sngewsih kaba la shim ia ka jingim jong ki 5 ngut ki nongshong shnong ka Dalu, West Garo Hills, kiba leit kum ki Pilkrim sha West Bengal.
Kine ki khlad noh ki kynthup ia u Rajendra Nath, Asha Nath, Buran Madak, u Shivraj Madak 10 snem ka rta bad Aushnath Madak 8 snem ka rta.
Haba phah ia ka jingsngewlem sha ki bahaiing bahsem kiba la duh noh ia la ki baieid bathoin, u Myntri Rangbah ula ong, ba ka jingduh noh ia ka jingim jong ki 5 ngut ki nongshong shnong ka Meghalaya, kynthup ia ki arngut ki khynnah ha ka jingjia kaba ym lah ban mutdur.
Ka Ophis jong u Additional Resident Commissioner ka Meghalaya House, kala iatreilang bad ki bor pyniaid District jongka Birbhum ban wad ia ki jingtip kiba pura bad ban ai ka jingkyrshan bad ka jingiarap katba lah sha ki longiing kiba la shah ktah.
Ki bor khmih ka jylla kin shimkhia ruh ban pynpoi ia ka met jong kine kiba la khlad noh sha ka jaka sah ka jongki.
Kila don ruh sa 6 ngut ki briew kiba na West Garo Hills kiba sah ha katei ka Hotel hynrei la ioh ban pyllait bad kila lait im na katei ka jingjia.
