Nongpoh, Nailar 17: Ka Meghalaya Weightlifting Association (MWA) ka la kyrpad ia ka Sorkar Jylla ba kan pynneh ia ka jingialehkai weightlifting ne iakop rah nar kum kawei na ki jingialehkai ne discipline ban long ha Jylla ha ka 39th National Games 2027.
Ka Association kaka pynpaw ruh ïa ka jingsngewnguh ïa ka Sorkar Meghalaya halor ka jingioh lad ka jylla ban pynlong ïa ka lympung, haba khmih lynti ba kane ka lympung kan wanrah ïa ki jingkylla kiba khraw ha ka kam ïalehkai hapoh ka jylla.
Ia kane la pynpaw da u President, Bah Donald Rymbai bad Secretary Bah Batskhem Basaïawmoit haba ong “ Ka National Games kan long ka lad kaba kongsan ban pynbha ïa ki jingdonkam ha ka kam ïalehkai, kynthup ïa ka jingdon ki tiar ïalehkai kiba biang bad ka jingpynbha ïa ki jaka ïalehkai bapher bapher ha kylleng ka jylla, khnang ba kin lah ban ïahap bad ki kyrdan international”.
Ka National Games ka dei kawei na ki lympung ïalehkai kiba heh ha ri India, kaba ai lad ïa ki nongïalehkai ban ïakhun na ka bynta ka jylla jong ki. Ka MWA ka ngeit ruh ba ka jingpynlong ïa kane ka lympung ha Meghalaya kan pynshlur shuh shuh ïa ki samla ban rung sha ki kam ïalehkai bad ban pynpaw ïa ki sap jong ki ha ki rynsan kiba heh.
Hynrei, wat hapdeng ka jingsngewkmen halor ka National Games, ka MWA ka la pynpaw ïa ka jingsngewsyier bad jingsngewsih halor ka jingtip ba ka jingïalehkai Weightlifting kaba la thmu ban pynlong ha Meghalaya, kan sa long noh ha jylla Mizoram.
Kat kum ka jingiathuh ka Association, ïa kane la ïoh jingtip ha ka jingïalang kaba long ha Shillong ha ka 23 tarik Naitung, ryngkat bad ka Meghalaya State Olympics Association (MSOA) ha ryngkat ka jingdonlang jong u Myntri ka tnat Sports bad ki nongmihkhmat na ki 39 tylli ki Sports Associations.
Ka MWA ka ong ba kane ka jingioh jingtip ba ka Weightlifting kan ym long ha Meghalaya ka la wan kum ka jingpynduh ïa ki jingangnud jong ka Association, namar ka la trei shitom ban sei bad pynkhreh ïa ki nongïalehkai kiba kynsai na ka bynta ka National Games.
Ka Association ka la pynpaw ruh ba naduh Jylliew 2025, ka la dep phah da ka shithi sha u Bah Shakliar Warjri, uba long Myntri ka tnat Sports ha kato ka por, bad sha u Director ka tnat Sports, da kaba kyrpad ban pynneh ïa ka Weightlifting ha Meghalaya.
Ka ong ba ka jingioh jong ka Meghalaya ban pynlong ïa ka jingïalehkai Weightlifting hapoh ka jylla kum shi bynta jong ka National Games kan long ka kabu kaba khraw ban kyntiew ïa ka jingïalehkai bad ban pynbha ïa ka rukom treikam jong ka Association bad kan wanrah shibun ki jingkylla, khamtam ha ka liang ka jingdon ïa ka jaka ïalehkai kaba biang bad ki tiar ïalehkai kiba long katkum ki standard jong ka international level.
Ka MWA ka la kyntu ïa ka Sorkar Meghalaya ba kan pyrkhat biang halor kane ka bynta bad ban pynneh ïa ka jingïalehkai Weightlifting hapoh ka jylla ha ka National Games 2027.
 ka la kyrpad ia ka Sorkar Jylla ba kan pynneh ia ka jingialehkai weightlifting ne iakop rah nar kum kawei na ki jingialehkai ne discipline ban long ha Jylla ha ka 39th National Games 2027.){kind=link}