Agartala, Nailar 17: U Pradyot Kishore Debbarma, uba dei u hehduh jong ka TIPRA Motha, ha ka sngi Nyngkong, u la maham ba ka party jong u kan pyrkhat biang ia ka jingiateh lok bad ka BJP, lada kam pyntreikam ia ka Tiprasa Accord, bad ong ba un “iaid noh la ka jong ka lynti” lada ym lah ban pynskhem ia ki hok ki trai ri trai muluk ka Tripura kat kum ka riti synshar.
U Debbarma u la kren ïa kane ha ka jingïalang ba la pynjlan jong ki nongïalam ka TIPRA Motha, ki MLA, ki MDC bad kiwei kiwei ki nongtrei jong ka seng ha Agartala, hapdeng ka jingiapher jingmut kaba la nang jur bad ka BJP halor ka jingpyntrei kam ïa ka jingïateh tripartite agreement.
Kane ka jingiakynduh ka long hadien ka jingiakren hapdeng ki nongialam ba rangbah jong ka BJP bad ka TIPRA Motha ha New Delhi halor ka jingiakhun lang kaba lah ban long ha ka Village Council elections ban wan.Hynrei ka jingiakren kam shym la lah ban pynbeit ia ki jingiapher jingmut, ha kaba u Debbarma u la pynskhem ba ka jingpyntreikam ia ka Tiprasa Accord ka dang long ka phang pdeng na ka bynta ka seng jong u.
U Debbarma u la ong ba katei ka jingiateh kaba la khmih lynti ban pyntreikam hapoh hynriew bnai, ka la sah khlem pynbeit la palat ar snem shiteng.
“Nga shai bha.Lada kine ki briew ki long kiba shimkhia, ki dei ban pyntreikam noh ia ka Tiprasa Accord”, u la ong da kaba kren shai ba ka jingdawa jong u kam dei na ka bynta ki kam sain pyrthei ne ka jingmyntoi pisa ia ki nongialam ka party.
U la ong ba u don “ka jingburom kaba khraw” ia u Myntri Rangbahduh ka ri u Narendra Modi bad ia u Union Home Minister Amit Shah hynrei u la maham ba lada ym pyntreikam ia katei ka jingiateh, ka seng jong u kan hap ban rai ia ka “lynti treikam kaba hadien” jong ka.
U Debbarma u la ong ba u la khot ia ka jingialang ba la pynjlan hadien ba u la don sha jngai na Tripura na ka bynta ka jingsumar shimet, ha kaba ki la don katto katne ki jingjia ha ka sain pyrthei ha ka jingbym don jong u.U la ong ba don ki katto katne ki mat kiba donkam ban ia kren bad pynshai hapoh ka seng shwa ban rah sha ki paidbah.
“Lada nga pan eiei na ka bynta ki MDC, MLA bad ki katto katne ki nongmihkhmat jong nga, bad pan ei ei na ka bynta ki briew jong nga kiba la wanrah ia ngi sha kane ka kyrdan, te ngam don hok ban khot Babagra ialade”, la ong u Debbarma.
Utei u heh ka TIPRA Motha u la kynnoh ruh ba ka BJP ka pyrshang ban pyntlot ia ka party jong u ha kane ka elekshon TTAADC kaba dang shu kut dang shen.U la kynnoh ba la pyrshang ban pynpait ia ka TIPRA Motha, kynthup ia ka jingpyrshang ban pynkohnguh ia ki MLA bad MDC jong ka, ha kaba ki don ki nongialam kiba la mih noh na ka seng ha kaba kut.
U Debbarma u la ong ba u la pynkhreh ban klet ia kaei kaba u la batai kum ki jingshah thombor shimet pyrshah ia u lada ka sorkar kan pynpoi ia ka hok riti synshar kaba ki trai ri trai muluk ki wad hapoh ka Tiprasa Accord.
Da kaba kyntait ia kaei kaba u la khot ka jingpyrshang ban pynhun ia ki nongialam kiba duna lyngba ki kyrdan sain pyrthei bad ki jingai pisa,U Debbarma u la ong ba kum kine ki sienjam kin ym lah ban weng ia ki jingeh jong ki trai ri trai muluk kiba kham bun.
“Khatsaw lak ngut ki briew kin iai sah ha ka jaka ba ki don”, u la ong da kaba ban jur ba um shym la rung ha ka sain pyrthei na ka bynta ka pisa hynrei ban pynthikna ia ka hok jong ki briew jong u.
Ki jingkynthoh ki la buh jingeh biang ïa ka jingïatreilang jong ka BJP bad ka TIPRA Motha, khamtam eh ha shwa ka Village Council elections.Katba kine ki ar seng ki dang long kum ki paralok ha ka sain pyrthei ha ka sorkar jylla, ka jingpynslem ban pyntreikam ia ka Tiprasa Accord ka lah ban long ka jingtynjuh kaba khraw ia ka jingiadei jong ki.
“Lada phim kwah ban ai (ia ki briew jong ngi ia ka hok jong ki), te ngan iaid la ka jong ka lynti”, la ong u Debbarma.
