Shillong, Nailar 16: Ka jingrakhe ia ka sngi laitluid kaba 80 snem jong ka Ri, ha Lok Bhavan Shillong ka iaid haduh ar sngi haka sngi U Blei da ki rong ki rup ka ri lane ‘Colors of India’, kaba la khring ia ki nongshong shnong, ki nongrep, ki nongthain kti, ki nongseng kam bad ki barikor ban sakhi ia ki program ba pyni nam iaki kolshor bad riti dustur.
Ka jingpyni nam ia ki mar ki mata lyngba ki stall jong ki nongrep, ki nongtrei kti bad ki nongseng kam seng jam, kala khring bha ia ki nongwankai kiba la thied ban rah sha iing ia kine ki mar.
Ia kane ka rynsan pyni nam, la pynlong ha ka jingiatreilang bad ka PRIME Meghalaya, ka Meghalaya State Agriculture Marketing Board, ka MEGNOLIA, ka tnad Arts and Culture bad kiwei kiwei ki tnad treikam jong ka Sorkar Jylla, kaba thmu ban pynkhlain ia ki lad kamai bad haka juh ka por ban kyntiew iaka rep ka riang bad ka kam shna jingshna jong ka Jylla.
Ki nongwan kai ki la jngohkai iaki Stall ba pyninam kum ka Mushroom Development Centre, Florish Meghalaya Orchid Garden and Chrysanthemum Farms, Indigenous Innovations of Meghalaya bad ki Women’s Group & Handicrafts Multi-Purpose Co-operative Society kiba la pyni ruh ïa ki kam shna jingshna tynrai ryngkat bad ki mar rep.
U Polison D Momin jong ka Nokma Ice Creams Cooperative Society ba la seng ha u snem 2024 da ka jingkyrshan na ka Meghalaya Basin Management Agency, u la ong ba ka rynsan jong ka Lok Bhavan ka la iarap ban pynithuh ia ki jingbam bala shna na u Sohphan, bad vanilla shaki paidbah.
“Ngi la lah ban die palat 3,000 tylli ha ka 15 tarik Nailar 2026”, la ong u Momin bad bynrap ba ka jingdie ka la palat ia ka T.1 lak.
Ka Tengchira A Sangma kaba la seng iaka Tengchi Brave Stitch na South Garo Hills ka la ong ba ka jingshim bynta ha ka sien kaba nyngkong eh ha Lok Bhavan ha ka sngi rakhe ia ka sngi laitluid ka Ri ka dei ka mawjam kaba khraw.
Ka nongjop jong ka PRIME E-Championship 2025 da ka jingïarap kam kaba T.2 lak, ka la ai burom ïa ka PRIME Meghalaya kaba la ïarap ban pynheh ïa ka kam jong ka.
Ka stall jong ka ka la kamai haduh T 25,000 tyngka ha ka shisngi.
“Ka long kaba kyrpang ban buh ia ka Stall ha Lok Bhavan ha ka sien kaba nyngkong ha ka por ba rakhe ia ka sngi laitluid”, ka la ong.
Na ka bynta u nongdro dur ha u maw u Bah Darsing Syiemlieh na Nongstoin, Khlieh Mawlieh, kane ka jingioh bynta ha Lok Bhavan ka la pyni ïa ka jingkiew ha ka kam shna jingshna kaba u la bud naduh u snem 1996.
Hadien ba la pynrung ïalade haka PRIME Meghalaya ha u snem 2023, u la ong ba ki jingioh kam naka jingmang ki briew kala kiew bha bad ki kam jong u ki la poi sha ki ïew kiba thymmai.
“Nga kwah ban ai khublei ïa u Myntri Rangbah ka Jylla Meghalaya bad ruh ïa u PRIME Meghalaya kiba la ai ka jingkyrshan jong ki. Namar ka jingai mynsiem jong ki, ha kaba khatduh ka pynurlong ïa ki jingangnud jong ngi,” ong u Bah Darsing.
Ha kane ka sngi la pyni ruh ia ki jingshad naki Jylla bapher bapher, Ka Karnataka Sangha na Mandya ka la shad daka “Devi Mahima, ‘The Glory of Nari Shakti’, hadien sa ka ‘Bharatanatyam rendition of “Vande Mataram” daka Prajna Kashyap na Mysore.
La pyni ïa ki jingshad tynrai na ki jaitbynriew Khasi, Jaiñtia bad Garo jong ka Jylla Meghalaya, ha ryngkat ka jingshad Bhawai bad “Kesariya Balam” da ka West Zone Cultural Centre, Udaipur, bad ka shad Kashmiri da ka Jammu & Kashmir Academy of Art, Culture & Languages.
