Shillong, Nailar 15 : U Myntri Rangbah ka Jylla Conrad K Sangma ha ka sngi Ba-ar ula pyndonkam ia ka jingkren rakhe Independence Day ban pyni ia kaei kaba u ong kum ki phra snem ka jingkylla jong ka Jylla, haba kdew ia ki jingkiew ha ka jingdon ki surok, ka koit ka khiah, ka pule dangle, ka rep ka riang, ka kam jngohkai bad ka iohkam ki samla haba buh ia ka 39th National Games kum uwei pat u mawmer ba kongsan.
Haba kren ha ka jingrakhe Independence Day ba 80 snem ka Ri, u Conrad ula ong ba ka Meghalaya kala kiew bha ha kine ki phra snem bala leit, da ka jingphaikhmat ka Sorkar sha ka jaka puta, ki briew bad ka kolshor.
Ula pynpaw ba ka ioh ka kot ka Jylla kala kiew arshah naduh u 2018 bad ong ba ka Meghalaya ka dei kawei na ki Jylla ba kiew sted bha hapoh ka Ri ha kine ki san snem bala leit noh.
U Conrad ula ong ba ka jingdon ki khlaw ha Jylla ka kot haduh 76% bad ka GREEN Meghalaya Plus Programme ka Sorkar kala wanrah ia 63,000 hectare ki jaka khlaw hapoh ka jingsumar.
Kumba 63,000 ngut ki nongrep kila ioh ia ka jingsiew ban iada ia ki khlaw, ula ong.
Ka jingkyrduh um ka dei kawei pat ka kam kaba la pynpaw da u Myntri Rangbah. Palat ia ka 60,000 tylli ki umpohliew lah dep ban ithuh na ka bynta ban iada bad palat 500 tylli ki jingtei ban pynlang um la dep ban thaw ha kylleng ka Jylla.
U iathuh ba ka jingdon ki longing ha ki nongkyndong kiba la ioh kor um iing kala kiew na ka 4,550 ha u 2019 sha ka 5.47 lak.
Halor ka kam tih par, u Conrad ula ong ba ka jingtih par kat kum ka jingstad saian kala sdang mynta ha Jylla hadien ka hukum jong ka Iingkashari Supreme Court ba 2019 ba iadei bad ka hok longtrai da ki riew shimet bad ki shnong ki thaw ia ki mawpoh khyndew kiba don hapoh ki jaka jong ki. Ula ong ba ka Sorkar kala pynkhreh ruh ia ki kyndon treikam na ka bynta ki nongtih par kiba rit baria.
Pynleit jingmut ha ki Nongrep
Ka rep ka riang ka dang long ka jingphaikhmat kaba kongsan bha, da ka CM FARM+ Programme kaba kyrshan ia palat 25,000 ngut ki nongrep ha kylleng ka Jylla da kaba ai ia ki symbai jingthung kiba shongdor.
U Conrad ula kdew ruh ia u Lakadong, Organic, Floriculrure bad Ginger mission kum ki nuksa jong ki prokram ka Sorkar ba thmu ban kyntiew ia ka kamai ki nongrep.
U ong ba ka Jylla kala kyrshan ia palat 4,500 ngut ki nongrep synsar lyngba ka CM ASSURE ha u snem bala lah bad kala siew ia ka bhah ki nongrep ba iadei bad ka Insurance premium jong ki palat 72,000 ngut ki nongrep hapoh ka Pradhan Mantri Fasal Bima Yojana.
Ka karkhana pynmih jynshoh ba thymmai ha Bhoirymbong, Ri-Bhoi, kan pynmih haduh 10000 metric ton u sying ha ka shisnem bad kan ai jingmyntoi ia kumba 5,500 ngut ki nongrep na ki 112 tylli ki shnong.
Ka koit ka khiah bad ka pule puthi
U Conrad ula ong ba ka jingiap ki longkmie ba kha khun kala hiar da palat 56% ha u snem 2020, katba ka jingiap jong ki Khunlung kala hiar da 40%.
Ka Chief Minister’s Safe Motherhood Scheme kala iarap ban pynkit sha ki jaka sumar ia kumba shi lak ngut ki longkmie ba arsmet ba kin ioh jingsumar, kynthup ia palat 15,800 ki longkmie kiba shitom jur, ula ong.
Ha ka pule puthi, u Conrad u iathuh baka Meghalaya kala jam na ka kyrdan ba hatrai duh hapoh ka National Performance Grading Index. Ka jingioh marks ka Jylla kala kiew na ka 448 sha ka 525 ha ka shisnem.
Ula kdew ruh ia ka jingkiew ha ka jingpass bha ki khynnah, ha kaba ka result SSLC kala kiew na ka 57% ha u 2018 sha ka 97.2%, katba ka result HSSLC kala kiew na ka 75% sha ka 86.6%.
Ka jingsiew tulop bala pynbeit ryntih ia palat 23,000 ngut ki nongkhaii hapoh ka SSA, Ad-hoc bad kiwei kiwei ki kyrdan kala treikam naduh ka 1 tarik Iaiong mynta u snem, ula ong.
Ka iohkam iohkam bad ka sengkam lajong
Palat 55,000 ngut ki samla kila ioh ia ka jinghikai hapoh ka CM Skill Mission naduh u 2022, ong u Conrad haba pynpaw ba palat 3,100 ngut ki samla kila ioh kam shabar ka Meghalaya ha ki kam kynthup ka kam pdiang sngewbha ia ki briew ba nabar, ka jingpynmih mar bad ka jinglum jingkhein jingdiah.
Ka PRIME programme mynta kala kyrshan ia palat 6000 ngut ki nongsengkam, katba ka CM-ELEVATE kala kyrshan ia palat 3000 ngut ki nongioh bynta. Ryngkat lang, kine ki prokam kila lah ban aikam beit beit ia 10,000 ngut bad 25,000 kiba ioh kamai, ula ong.
Ka kam jngohkai kala nang iar, da ka jingnang kiew ka jingwan kai ki briew ba nabar ha ka shisnem, kaba long na ka 12 lak ha u 2018 sha ka 18 lak.
Ka Homestay programme ka Sorkar kala ai ka jingkyrshan ba kot haduh T.7 lak sha ki nongsengkam shimet, ong u Conrad.
Ka put ka tem, kam ialehkai bad ki samla
Ka Meghalaya Grassroots Music Programme kala kyrshan ia palat 8,850 ngut ki kaitor lyngba palat 18,000 ki jingai rynsan ba kin pyni ia ka sap, ong u Myntri Rangbah.
Ha ki kam ialehkai, haduh 240 tylli ki project tei jingtei ha ki shnong ki thaw kila dep bad ki dang don ruh kiba dang iaid ka kam. Ka STAR programme kala khmih bniah ia 24,500 ngut ki khynnah ialehkai.
U Conrad ula iathuh ba ka policy thungkam beit beit ka Sorkar ia ki nongialehkai ba wanrah nam kala dep ban ai jingmyntoi ia u nongkhur takma na ka kop niah lieng Cacoe Pynshngain Kurbah, uba dei u nongialehkai ba nyngkong eh ban ioh ia ka kam Sorkar hapoh kane ka policy.
U Myntri Rangbah ula kren ruh halor ka DREAM Mission ka Sorkar ban iakhun pyrshah ia u droks bad ong ba ka jingdon ki rehabilitation centre ha Meghalaya kala kiew na ka 9 ha u snem 2018 sha ka 14.
Ka kolshor bad ki lad pyniasoh
U Conrad ula ong ba ka Sorkar kala pynleit jingmut halor ka jingpynneh pynsah ia ka jinglong kyrpang ka kolshor ka Jylla.
Ka Jubili Ksiar jong ka Wangala Festival mynta u snem kan don ia ka jingtem ksing ba 1000 ha ka jaka jong ka 100 ba ju leh baroh shikatta, ula ong.
Ka Sorkar kala pynlong ruh ia ka Shad Nongkrem kum ka jaka wan jngoh ia ka kolshor bad kala pynlait ruh ia ka prokram “Tracing the Roots”, ha kaba haduh 75 ngut ki scholar kin wadbniah ia ka tynrai bad ka lynti iaid jong ki Khasi, Jaintia bad ki Garo na Vietnam, Cambodia bad Tibet.
Ula ban biang ia ka jingdawa jong ka Jylla ban pynrung ia ka ktien Khasi bad Garo ha ka Khyrnit ba Phra jong ka Riti Synshar ka Ri.
Halor ki lad pyniasoh, u Conrad ula ong ba ka Sorkar kala dep ban shna ia palat 3,200 km ka surok ha kine ki phra snem bala leit noh.
National Games ha u 2027
Haba khmih shakhmat, u Conrad ula ong ba u snem ban wan un dei uba kongsan bha namar ka Meghalaya kan kynjoh ia ka 55 snem bad kan pynlong ia ka 39th National Games.
Palat 10,000 ngut ki nongialehkai na kylleng ka Ri la khmih lynti ba kin wan iashimbynta ha ki 39 tylli ki jait jingialehkai, ki ban long ha Shillong, Tura bad Jowai nalor kiwei ki jaka.
U Conrad u iathuh ba ki jingpynkhreh kila iaid ha ka lynti kaba dei bad ba ka Sorkar ka kwah ba kane ka lympung ialehkai kan pyni ia ka sap ialehkai ka Jylla, ka kolshor bad ka jingpdiang sngewbha ka Jylla ia ki briew ba nabar.
U Conrad ula pynkut ia ka jingkren da kaba sot ia ka poetri u Soso Tham bad ki kyntien u nongthoh kot ki Garo Howard Denison Momin, haba kyntu ia ki samla ba kin khmih shakhmat, wad ia la ka lynti bad im ha ka rukom ka ban ieh shadien ia ka nam.
U Myntri Rangbah ula ai khublei Independence Day ia ki paidbah ka Meghalaya bad pynkut da ka kyntien “Khublei, Mitela, Jai Hind, Jai Bharat.
