Shillong, Nailar 13: U Myntri ka Sorkar Jylla bad MLA ka South Shillong Constituency Bah Sanbor Shullai ha ka sngi Palei, ula rakhe ia la ka jong ka sngi kha bad ki paitbah ka Constituency bad sam ruh ia ka skhim kaba kot palat T.65 klur ban pyntrei ia ki kam pynroi ha kylleng ki shnong ka constituency.
La sdang ia kane ka jingrakhe sngikha da ka jingbuh jingduwai u Fr Richard Majaw bad hadien kane u Bah Sanbor Shullai ryngkat bad la ka kurim ula ot ia u cake sngikha jong ka jingdap 60 snem ka rta.
Ha kane ka prorkam la wan ban iadonlang u Nongialam ka Liang Pyrshah ka KHADC u Bah TW Chyne, u President ka BJP Meghalaya u Rikman G Momin, ki nongialam niam, ki nongialam ka seng BJP, ki nongialam shnong bad da ki spah ngut ki paitbah ban aishimbynta ha katei ka jinglehkmen.
Hadien ka jingrakhe sngikha, u Bah Sanbor Shullai ula pyllait paitbah ia ki skhim kaba T.65,45,17,213 na ka bynta ban pyntrei ia ki kam pynroi bapher bapher ha kylleng ki shnong ka South Shillong Constituency.
Haba ai jingkren ha kane ka sngi, u Bah Sanbor Shullai ula ai khublei kyrpang ïa u Myntri Rangbah ka Jylla u Conrad K Sangma, ki symbud Myntri Rangbah ka Jylla Bah Prestone Tynsong bad Bah Sniawbhalang Dhar, kiba la iarap bad ai jingkyrshan na ka bynta ki skhim bapher bapher ban kyntiew ia ka bha ka miat bad ka roi ka par jong ki paid nongshong shnong ka South Shillong Constituency.
Nalor kane, ula ai khublei ruh ia ki ophisar sorkar, ki nongtrei sorkar, ki nongialam shnong bad ia ki paid nongshong shnong ia ka jingiai bteng ban ai jingkyrshan bad khamtam ha kaban lah ban pyntyllun ia ki skhim bapher bapher kiban long ka jingmyntoi bad ka jingkyrkhu ia ki paitbah.
La pynshongkun ia kane ka jinglehkmen da ki jingrwai bad jingshad na ki samla shynrang bad kynthei.
Ki nongialam, ki paitbah bad ki kynhun bapher kila leit kitbok kitrwiang bad ai ruh ia ki jingai sngewbha ia u Bah Sanbor ha ka sngikha ka jongu.
