Shillong, Nailar 13: Myntri Rangbah ka jylla u Conrad K Sangma u la ong ba ka jylla Meghalaya ka la thaw ia ka state committee ban wanrah jingpynkylla ia ki kyndon tih dewiong ki ban iarap ia ki nongtih bad ki trai jong ki par dewiong barit
U Conrad u la ong ba ia katei ka panel la thaw hadien ka jingiakynduh jong u bad ka Coal Ministry ka Sorkar Pdeng ban pan ban pynlait ia ka kyndon ba la buh ia ka jaka kaba heh haduh 100 hectare.
“Ka jingkyrpad jong nga ka long ba donkam ban leh ia ki jingkylla kiba donkam ban ailad ia ki nongtih bad ki trai dewiong kiba don jaka barit khnang ba maki ruh kin lah ban sdang tih dewiong katkum ka juh stad mynta katkum ka ain. Ka jingdonkam mynta kaba long 100 hectare bad kiba bun ki nongtih dewiong trai Jylla kim lah ban apply license,” u la ong.
U Myntri Rangbah u la ong ba u Myntri Sorkar Pdeng u la pdiang sngewbha bad u la kyrpad ia ka Jylla ban thaw ia ka Committee.
“Nga sngewkmen ban pyntip sha phi ba la thaw ia ka Committee. Ki dkhot na ka liang jong ngi ki kynthup ia u Additional Chief Secretary, u Principal Secretary, u Advocate General, bad kumjuh ruh u Director ka tnad Mining jong ka Jylla” ula ong.
Kawei ka jingialang jong ka Committee ka la long, ha kaba la pynlong ruh ia ki ar sien ki jingialang Technical Team bala pyniaid da Additional Secretary.
“Ka jingialang kaba ar kan long ha ki taiew ban wan. Ngi kyrmen shibun ba ngin lah ban wad ia ka lad kaba bha khnang ba ki trai par dewiong kiba rit jong ngi kin lah ban pyniaid ia ki par dewiong jong ki ha ka rukom kaba shngain bad kaba iadei bad ka ain. Kane ka dei ka sienjam kaba kongsan bha na ka bynta jong ngi,” ula bynrap.
