Shillong, Nailar 13: Ka Meghalaya High Court ha ka sngi Palei kala pynpaw ia ka jingbym sngew tynnad halor ka jingkynnoh ba khlem pyntreikam ia ka hukum ba thungbiang ia u Pa’iem Ainam Manik Syiem kum u Syiem ka Hima Mylliem, haba bthah ia ka Jylla ban ai jingkhubor ia ka jingpyntreikam hashuwa ban kut ka sngi.
Haba shong bishar ia ka mudui pynkhein hukum (contempt petition), la pyntip ia u Justice HS Thangkhiew ba watla ka Iingkashari ha ka 11 tarik Nailar kala pynmih ia ka hukum ba khein iap ia ka jingthung Acting Syiem, uba dei u nongshah mudui No 4, u Acting Syiem um pat shym la aiti satia ia ka kam.
U nongiasaid ain u nongmudui, L Khyriem ula pyntip ba ka Iingkashari kala bthah “ban thung biang noh ia u Pa’iem Ainam kum u Syiem ka Mylliem bad ba ia ka hukum thung Acting Syiem la kdat noh sharud bad khein iap”
“Wat hapdeng kine ki jingbthah kiba shai, u nongshah mudui N0 4 (Acting Syiem) ula kyntait ban aiti ia ka shuki bad pyllait ia ka Ophis….ia u shabi jong ka kamra ka Ophis ruh u dang don beit bad u” ong u Bah Khyriem.
U Nongiasaid ain jong ki nongshah mudui HL Shangreiso ula pan por ban pynshisha ia ki jingkynnoh ba u khlem pynksan ba kam shym la don ka jingpynmih ia ka hukum thungbiang. Ia ka notice lah hukum ban phah sha u Acting Syiem.
Ka Iingkashari ka ong ba ka hukum ba 11 tarik Nailar kam shym la don eiei shuh ban nang sngewthuh bakla.
“Kala shai ba ka jingthung ia u Acting Syiem kala shah khein iap bad um dei shuh u Acting Syiem. Haba pyntreikam ia ka hukum kane ka Iingkashari, u dei ban pyllait noh mardor ia ka Ophis bad aiti noh ia ka shuki” ong u Justice Thangkhiew.
Haba pynpaw ia ka jingbyn sngewtynnad ia kane ka jingbym kohnguh, ka Iingkashari kala maham ba ka lah ban ai jingpynsajia pynkhein hukum ne contempt.
Ia kane ka mukotduma la buh ban bishar biang ha ka 17 tarik Nailar, 2026.
