Shillong, Nailar 13: U Myntri Rangbah ka Jylla Conrad K Sangma ha ka sngi Palei, ula ong ba ka jingpynkylla ia ki kyndon aiñ ban pynlong elekshon ha Garo Hills Autonomous District Council kadei ka sienjam ban iada ia ka jinglong tynrai ki riewlum, hadien ba ka Council kala shna ia la ka jong ka Electoral Roll na ka bynta ka elekshon GHADC.
Ka GHADC kala pynkylla ia ka Rules 128 bad 129 ha ka 10 tarik u Nailar ban pyrkhing ia ka jingthep vote na ka bynta ka elekshon jong ka Council tang na ka bynta ki nongshong shnong kiba dei ki Scheduled Tribe ha ka jylla Meghalaya.
“Kane ka long ka sienjam kaba kongsan bha ban iaid shakhmat, namar ba kane kan thaw kyrpang ia ka thup kyrteng ki nongthep vote na ka bynta ka GHADC” ong u Sangma.
“Kumba lah kdew ha katei ka Amendment, tang ki trai shnong bad ki nongshong shnong kiba dei ki Scheduled Tribe ka Meghalaya kin lah ban thep vote ha ka elekshon jong ka GHADC” ula bynrap.
U Myntri Rangbah ula ong ba katei ka jingshim rai kadei kaba iaid ryngkat lang bad ka jingkular jong ka Sorkar Jylla kaba kala khlei sha ki jaidbynriew riewlum.
“Kane ka iaid lang ruh bad ki jingkular kiba bun kiba ngi lah kular na ka liang ka jong ngi bad na ka liang ka Sorkar. Ngi sngewkmen ba kane kadei ka sienjam kaba kongsan na ka bynta ban iada ia ka jinglong tynrai bad ia ki hok bapher bapher jong ki jaidbynriew riewlum jong ka jylla Meghalaya” ong u Sangma.
