Kyrpad u CM ban weng ia u pud ban shim ia ki EAP | Donkam ka jingpynjynsur ia ka Meghalaya

Shillong, Nailar 13 : U Myntri Rangbah Conrad K Sangma ula kyrpad ia ka Sorkar Pdeng ban weng noh ia ka jingbuh pud ban shim ia ki Externally Aided Project (EAP), haba iasaid ba kane kan iarap ia ki Jylla kiba rit kum ka Meghalaya ba kin ioh kham bun ka song pisa na ka Sorkar.

Haba kren sha ki lad pathai khubor ha ka sngi Palei halor ka jingwan Delhi jong u dang shen, u Conrad ula ong ba ia kane ka kam lah iakren beit beit bad ka Myntri Pla Tyngka ka Ri.

“Ka mat ba hakhmat eh jong nga ka long ban kyrpad ia ka Myntri Pla Tyngka ban nym buh ia uno uno u pud ban shim ia ki EAP. Ngi la kyrpad biang ia ka ba lada kam don ka jingbuhpud, kan iarap ha kaban kyrshan khamtam ia ki Jylla kum ka Meghalaya” ula ong.

U CM ula pyntip ba ki don bun ki project EAP na ka bynta ka Meghalaya kiba la dep ioh ia ka jngmynjur hynrei ki sah satang ban pynmih ia ka jingpynbna.

“Ki don bun ki project thymmai bala mynjur na ka bynta ka Meghalaya. Ka jingialang kala dep lang bad ai jingmynjur ia ki project EAP. Ngan sa iasam ia ki jingtip ba bniah hadien ba pynmih ia ki mat bala iakren jong ka jingialang” ong u Conrad.

“Nalor kine kiba la mynjur, ngi la iasaid ha ka ban weng noh ia ka jingbuhpud khnang ba ngin lah ban aplai ia kham bun ki skhim hadien habud” ula ong.

Iakren ruh halor ka jingpynheh ia ka NEIAH, ai jingmynjur ia ka MEPRF :

U Conrad u pyntip ba ula iakynduh ruh ia u Myntri Khynnah Ayush Pratab Rao Jadhav bad kyrpad ban pynheh noh ia ka NEIAH, Shillong da ki jingdonkam kum ki kper kynbat dawai bad ki madan ialehkai na ka bynta ki samla pule.

“Ka jingialang ka long kaba sngewtynnad bad nga kyrmen ba ka Ministry kan leh eiei noh kloi” ula ong.

Halor ka kam mariang, u iathuh ba ula iakren halor ka jingpyntreikam ia ka MEPRF Fund bad u Myntri ka Ministry of Forest. Ia kane ka pisa la khmih da ka Central Committee kaba khlieh da u Additional Secretary.

“Ula kyrpad ba lada ia ki jingtyrwa la ai jingmynjur man ka por, kan iarap ia ngi ban pyntreikam kham sted ia ki skhim. Nga kmen palat ba hadien ka jingialang, u Chairman ula khot ia ka jingialang ha kine ki 3-4 sngi bala leit bad ia ki jingtyrwa ba sahteng, ula ai jingmynjur lut” bynrap u Conrad.