Shillong, Nailar 13 : U Myntri Rangbah Conrad K Sangma ha ka sngi Palei, ula iathuh ba ka Sorkar ka dang iakren bad ki kynhun bapher bapher halor ka project Shree Cement bad kan sa shim ia ak rai hadien ba dep sngap lut ia baroh ki liang, hapdeng ka jingaipor ba 15 sngi ka KSU ban pyndam ia ka public hearing bala dep.
U Conrad ula pynpaw ba watla ki don kiba pynpaw ia ka jingsngewkhia, kiba bun ki trai shnong ha ka jaka ba treikam ka project, kila pdiang ia kane ka karkhana.
“Ngi la iakren bad ki kynhun bapher bapher bad ngin iapeit ia baroh ki bynta. Kumba phi tip, kawei pat ka bynta ka long ba ki don bun ki trai shnong ha katei ka jaka kiba don bynta, kila pynpaw ia ka jingkmen bad kila kyrshan ia ka jingwan kane ka karkhana” ula ong.
“Ngi hap ban shim ia ka jingmynjur lang jong baroh ki kynhun. Ngi hap ban pynthikna ba ngin iakren bad baroh. Ka jingiakren kala iaid bad hadien ki jingiakren, ngin sa peit kumno ngin iaid shakhmat”.
Halor ka surok ba kynnoh tih ha ka sngi ba long public hearing, u CM ula iathuh ba u Deputy Commissioner ula hukum ia ka jingtohkit bad ka Sorkar ka dang ap ia ka kaiphod.
“U Deputy Commissioner ula hukum ban tohkit ia kaei kaba jia. Kumta, ngi dang ap ia ka kaiphod” ong u Conrad haba pynpaw ba ka Sorkar ka long kaba kloi ban iakren bad kino kino ki kynhun kiba pyrshah ia ka project.
