Shillong, Nailar 13 : Ka Kynhun Myntri ka Sorkar Jylla kala ai jingmynjur ia ka draft resolution ba pyrshah bad khang ia ka jingtih uranium hapoh ka Jylla.
U Myntri Rangbah Conrad K Sangma u iathuh ba ia kane ka resolution yn sa rah hapoh ka Iingdorbar Thaw Ain ha ka Dorbar Synrai ka ban sdang ha ka 24 tarik Nailar.
Haba kren hadien ka jingialang ka Kynhun Myntri ha ka sngi Palei, u Conrad ula ong ba ka nongrim jong ka Sorkar pyrshah ia ki kam ba iadei bad ka jingtih uranium ka long kaba skhem bha.
“Ka Kynhun Myntri kala ai jingmynjur ia ka draft resolution pyrshah ia ka jingtih uranium hapoh ka Jylla Meghalaya ka ban sa wanrah hapoh ka Dorbar Synrai u snem 2026, ka ban sdang ha ka 24 tarik mynta u bnai” ula ong.
Halor ka jingdawa jong ki seng pyrshah uranium ban khang dam ia ka Ophis ka Atomic Minerals Division ha Shillong, u Myntri Rangbah ula ong ba ka jingphaikhmat mynta ka long ban lah mynjur shuwa ia ka resolution.
“Baroh kine kiei kiei ki dei ki jingthmu jong ka Sorkar hynrei ia mynta, kumba Nga ong ba ka resolution kala shai bha ba ngin kyrpad ia ka Sorkar India ba kino kino ki jingtih lane ki kam ba iadei bad u uranium, ym dei ban leh hapoh ka Jylla Meghalaya” ong u Conrad.
U bynrap ba shisien ba ka Iingdorbar Thaw Ain kala mynjur ia ka resolution, ka Jylla kan sa shim ia baroh ki sienjam ban pynthikna ba kino kino ki kam ba iadei bad u uranium kin ym jia shuh.
