Phah tuklar ka JNC ha u CM halor ka project tih mawshun ha Lum Syrman | Aipor 10 sngi ban leh eiei

Shillong, Nailar 13: Ka Jaintia National Council (JNC) ha ka sngi Palei kala aiti ia ka dorkhas ha u Myntri Rangbah ka Jylla u Conrad Sangma ban tuklar mardor ia ka jingthmu jongka jingtyrwa ia ka jaka kaba 217.394 Hectare ha Lum Syrman na ka bynta ka Limestone Project jongka M/s Shree Cement Limited, East Jaiñtia Hills.

Hapoh ka jingialam u General Secretary u Bah Wanshwa Suting, ka JNC kala ong ia ka sorkar ia ka jingsngewkhia ia ka hok jong ki trai jaka bad ki nongrep jongka “Sutnga bad Nongkhlieh Elaka”, khamtam ia kito kiba rep ba riang,ka kolshor, riti dustur, kiba pyndonkam ia ka hok bad kiba iadonbynta bad ka thain Lum Syrman.

“Ia ki hok dei ban iada bad pynneh pynsah hashwa ban shim ia kino kino ki sienjam ban ailad ia ka jingkyrshan ia katei ka projek” la ong ka seng.

Ka JNC kala pynpaw ba ka jaka kaba dang don hapdeng ka jingbuh jingkylli ym lah ban shu khein sting namar ban ioh ia ka Environmental ne Industrial Clearance ka long kaba kongsan.

Kala ong ba ki trai jaka kiba la shah ktah kila kdew ia ka ain bad hok longtrai ia ki bynta jong u Lum Syrman bad kila pynpaw ia ka jingsngewkhia ha kaba iadei bad ka jingbym don ia ka jingai jingmynjur kaba shongain bad kano kano ka jingiapynbeit kaba long katkum ka ain ha kaba iadei bad katei ka projek kaba la tyrwa.

Ka council ka dawa ba dei ban pyndep hapoh ka por bad ka jingpynshisha kaba thikna bad shai kdar ia ka khajna, regjistreshon, ka jingbat tynrai ia ka jaka, ka rep ka riang bad kiwei kiwei ki kot ki sla kiba don ia ka rekod”.

Ha ka dorkhas la kdew ruh ia ka jingeh jong ki nongrep kiba ju rep ju riang bad shaniah da ki phew snem ha u Lum Syrman.”

Ka JNC kala ong, ba ki jaka rep , ka rep ka riang bad ka kamai kajih yn ym lah ban buh noh sharud ha ka kyrteng ban tih ia ki marpoh khyndew bad iawer ban iada ia ka jinglong kumba lah ju leh bad ia ka hok ban rep bad ban khmih bniah ia ka jingshah ktah jong ka jingkamai jakpoh.

Kala bynrap ba ki bun ki nongrep kiba la shah ktah bad ki trai khyndew kiba la duh iala ka khyndew ne ia ka kamai kajih, ka jingai ia ka bai lutksan kaba mar katjuh halor ka jingmad ia ka jingduhnong, dei ban pynthikna, da kaba khmih bniah ia ka hok jongka jinglongtrai.

Haba kren halor kane ka mat, u General Secretary u Wanshwa Suting ula buh jingkylli ia ka rukom pynlong ia ka public hearing ha ka 31 tarik Naitung.

“Ka paw ba ka Sorkar Jylla ka iashah ia kine ki karkhana dewbilat ban leh ia ki kam jongki, wat ban poi shaduh u pud ban khanglad ia ki nongshong shnong ban iashimbynta ha ka public hearing ha ka 31 tarik u Naitung. Lada ka sorkar ka skhem jingmut ba ia kiei kiei lah leh ha ka rukom kaba biang bad kaba khuid bad shai kdar, te balei ki nongshong shnong bad ki trai jaka kiba la shah ktah kin mad jingeh ha kaban pyndonkam ia la ka hok ban iashimbynta” ula ong.

Ka JNC kala dawa ba dei ban pynlong ia ka jingkhmih bniah kaba pura ia ka Public Hearing ha ka 31 tarik u Naitung, kynthup ia ka jingwan bad ia ka rekod jongka jingiashimbynta ki briew, ki jingpyrshah, ka jingpyniaid ia ka jingialang bad ia baroh ki video kiba ka ring pura.

Ka seng kala buh jingkylli la lane ka Hearing kadei kaba la pynlong da ka jingseisoh bad kaba khuid bad kala dawa ban pynlong thymmai ia ka jingiasyllok bad ki paitbah lada lap ba don kano kano ka jingduna ne jingdkoh ha ka rukom pyniaid.

Ka council kala ong, “Ym dei ban mih kano kano ka jingpynkylla na ki bor kiba dei khmih haba ia ka jingkylli ia ka jingiakynad ha kaba iadei bad ka hok jong ka khyndew, jingai jingmynjur, ka jingbat ia ka jaka, rep ka riang bad ka jingiashimbynta kadei kaba ym shim la khmih bniah satia”

Ka JNC kala ai por 10 sngi ia ka sorkar naduh ka sngi kaba la ioh pdiang ia kane ka dorkhas, ban pdiang ia ka jingkongsan bha bad ban sdang ia ki sienjam kiba dei na ki bor kiba dei khmih.

Kala byrngem ba lada kam don kano kano ka jingshimkhia ne leh eiei hapoh ka por kaba la buh, kam banse ban shim shuh shuh ia ka lynti kaba jaijai, kaba shongain̈ bad katkum ka hok synshar paitbah, kynthup ia ka jinglum ia ki paitbah bad kiwei pat ki rukom da ka jingiakhih paitbah tad haduh ba ia kitei ki jingsngewkhia jong ki briew kiba shah ktah kin ioh pdiang ia ka jingshah khmih bniah biang.

“Kane kam dei ka jingiakhun pyrshah ia ka roi ka par. Kadei ka jingiakhun na ka bynta ka hok, khuid ka suba ha ka rukom treikam bad ia ka hok jong ki paitbah kaba ia ka jaka bad kamai jakpoh ka don hapdeng ka jingma. Ka kam pynroi kam mut ban knieh noh bad ka jingiasyllok bad ki paitbah kam lah ban long kaba la shu leh tang dep rukom. Ki trai jaka bad ki nongrep ka Sutnga bad Nongkhlieh ki dei hok ban ioh ban pynsngew ia ka jingsngew ka jongki bad ia ka hok na ka bynta ka bha ka miat dei ban iada” la bynrap u Bah Suting.

Ka JNC ka iengskhem ba kan iai bteng ban shimkhia ia kane ka mat lyngba ka lynti kaba shongain, katkum ka synshar paitbah bad ki lynti katkum ka riti synshar paitbah bad ban bteng ban ieng bad ki trai jaka kiba shah ktah bad ki paid nongrep jong ka Lum Syrman tad haduh ba la shimkhia thikna bha ia ka jingeh kaba shongain bad ban shimkhia pura bha.