Shillong, Nailar 12: Ki nongsiat khnam ka South West Khasi Hills ki la ioh bat iaka kyrdan ba nyngkong ha ka Indian Round jong ka lympung Meghalaya State Archery Championship 2026, watla ka dang don ka lad kaba biang na ka bynta kiwei pat ki district ban ioh ban iakhun ha ka thup Recurve bad Compound Events lashai ka sngi.
Kane ka lympung ialehkai siat khnam kaba lai sngi kaba la sdang hynnin ka sngi, ka dei kaba la pynlong da ka Archery Association of Meghalaya (AAM) ha Sports Authority of India centre ha NEHU.
Ka SWKH ka la khur 5 tylli ki takma ksiar, 4 tylli ki takma rupa bad 4 tylli ki takma rnong, kaba la pynlong ïa ka district ban khur ïa ka kyrdan ba ar tang ha khmat jong ka West Khasi Hills kaba khur (4G, 2S, 5B).
Ka East Jaiñtia Hills kala khur (3G, 2S, 2B) ka la ïoh ïa ka kyrdan kaba lai, katba ka East Garo Hills kaba ioh khur (3G, 1S, 2B) ka la wan ha ka kyrdan kaba saw (bad kaba heh tam napdeng ki district Garo Hills) bad ka East Khasi Hills kaba khur (1G, 4S) ka la wan ha ka kyrdan kaba san.
Baroh ki district ki la jop la kumno kumno kawei ka takma, lait noh tang ka North Garo Hills.
Ka Indian Round ka dei ka jingïa siat khnam kaba ïakhun ha ka ri baroh kawei kaba pyndonkam da ki khnam kiba la shna da u siej, me u dieng.
La thaw ha u snem 1989, da uwei na ki nongprat lynti u Woodward Sohliya uba dei jong ka Jylla Meghalaya.
Da ki khnam jong ka juk mynta kiba rem dor, ka Indian Round ka pynlong ïa ka jingïa siat khnam ka plie lad ia baroh ban ïashim bynta bad ka pynneh pynsah ïa ki riti dustur tynrai.
Ïa ka Indian Round la ïakhun naduh ki sub-junior haduh ki kyrdan senior na ka bynta ki shynrang bad kynthei bad individual, team bad mixed team categories.
