Shillong, Nailar 10: Ka Khasi Students’ Union (KSU) Laban Circle ka la kyntu ïa ka Laban Bengalee Boys’ HS School ban pynrung ïa ka ktien Khasi kum ka sobjek naduh u snem pule 2027, da kaba ong ba kane ka dei ka sienjam ban pynneh pynsah ïa ka ktien bad ka kolshor tynrai jong ka Jylla.
Ha ka shithi sha u Principal, ka KSU Laban Circle Education Cell ka la ong ba ki skul ki don ia ka bynta kaba kongsan ban pynim bad pynneh ia ki ktien lajong.
“Na ka bynta ka jaitbynriew Khasi, ka ktien Khasi ka kit ia ki pateng jong ka jingnang jingstad, ki riti dustur bad ka kolshor. Ka jingailad ia ki khynnah skul ban pule Khasi hapoh ka sawdong sawkun jong ka skul kan don ka bynta kaba kongsan ha kaba pynskhem ia ka jingiadei jong ki bad ki tynrai jong ka ktien bad ka kolshor jong ki,” la ong ka shithi.
Ka KSU ka la ong ba ka jingpynrung ia ka ktien Khasi kan ailad ia ki samla pule ban nang bad sngewthuh ia ka jingriewspah jong ka ktien katba ka pynthikna ba kan pynneh haduh ki pateng ban wan.
“Ngi ngeit ba ka jingpule ka don ka bynta kaba kongsan ban pynthikna ba ki ktien tynrai jong ki trai Jylla kin dang iai bteng ban neh haduh ki pateng ban wan” kala ong.
Kala kyrpad ïa ka skul ban shimkhia ïa kane ka kam bad ban kynthup lang ïa ka ktien Khasi kum ka subject katkum ki kyndon pule naduh u snem 2027.
“Ngi khein kor shibun ia ka bynta jong ka skul ha kaba pynwan dur ia ka jingnang jingstad bad ka jinglong jong ki samla bad ngi ngeit ba kum kane ka jingthmu kan long ka jingnoh synniang kaba don jingmut sha ka jingpynneh pynsah bad kyntiew ia ka ktien Khasi”.
 Laban Circle ka la kyntu ïa ka Laban Bengalee Boys’ HS School ban pynrung ïa ka ktien Khasi kum ka sobjek naduh u snem pule 2027, da kaba ong ba kane ka dei ka sienjam ban pynneh pynsah ïa ka ktien bad ka kolshor tynrai jong ka Jylla.){kind=link}