Guwahati, Nailar 10: Kumba khatphra ngut ki briew ki la mynsaw, hadien ba la don ka jingiasiat ha ka por ba don ka jingiakhun ha khappud Assam-Arunachal Pradesh ha ka step jong ka sngi Nyngkong.
La iathuh ba katei ka jingjia, ka la jia ha Mingmang Badati, ha kaba ka jingkulmar, ka la nangjur shuh shuh, hadien ka jingiakajia, halor ka jingkynnoh ia ka jaka ba la kam ka Assam, ba la kam da ki briew na Arunachal Pradesh.
Katkum ka report, ki jingkynnoh bad ki jingkynnoh pyrshah halor ka jingkynnoh ba la don ka jingwan kam tuh ki dang ïai bteng hapdeng ki nongshong shnong jong ki arliang mamla. La iathuh ba katei ka jingiakajia, ka la nang kiew sha ka jingiakynad, hadien ba ki nongshong shnong ka Assam, ki la leit sha katei ka jaka, ban pyrshah ia ka jing kynnoh ba la knieh ia ka jaka jong ki.
“Ka jingïakynad hapdeng kine ki ar kynhun la ïathuh ba ka la nang jur stet bha, ha kaba na ka liang jong ka Arunachal ka la kynnoh ba ka la pyndonkam ïa ki suloi kiba la thew beit ïa ki nongshong shnong jong ka Assam,” ong ka tyllong khubor.
Ka jinglong jingman ka la kylla long kaba shyrkhei hadien ba la iathuh ba la siat na ka liang jong ka Arunachal, ong ki tyllong khubor.
Kitei ki 18 ngut kiba la ithuh ba ki la mynsaw na ki kuli ki long u Durgeswar Patir, u Rohit Doley, u Nagaraj Doley, u Bigneswar Patir, u Pame Pegu, u Sanjay Tayung, u Utpal Doley bad u Jan Doley.
Ia kine kiba mynsaw la pynkit nyngkong sha Gogamukh Rural Hospital. Katkum ka jingtip ba la lah ban ioh, katto katne ngut ki briew kiba la mynsaw hadien la phah noh sha Dhemaji Civil Hospital ban ioh ia ka jingsumar kaba kham bniah.
Uwei u nongsakhi u la kynnoh ba uwei na kiba siat u dei u pulit ophisar jong ka Arunachal Pradesh.Ia kane ka jingkynnoh ym shym la lah ban pynshisha.
Kane ka jingjia ka la pynmih ïa ka jingsngewkhia halor ka jingïakynad ha khappud jong ka Assam-Arunachal Pradesh, ha kaba ki jingïakajia halor ka jaka puta bad ka jingkynnoh ba la shah thombor ki ba ju jia ha ki por ba la dep.
Kumba long mynta ki dang ap ia ki jingtip ba bniah halor ka jingbun bad ka jinglong jingman jong kiba mynsaw, kumjuh ruh ia ki jingjia kiba la pynlong ia katei ka jingshah siat.
