Nongpoh, Nailar 08: Ka ophis u Deputy Commissioner ka Ri Bhoi ka la pynlong ïa ka jingjurip kyrpang ïa ka National Highway na Byrnihat haduh Jorabat, da ka thong ban peit bniah bad ban tehlakam ïa ki kali khamtam ki trok, kiba ju pynieng khlemakor harud jong ka surok.
Ha kane ka jingjurip, ki ophisar na ka District Transport Office, ka tnat PWD bad ka tnat Pulit ki la ïatreilang ban peit ïa ka jinglong jingman jong ka surok, khamtam ha ki bynta kiba ju mih ka jingdheng kali bad ka jingpynthut ïa ka leit ka wan jong ki paidbah.
Ïa kane ka jingleit jurip la ïalam da u Assistant Commissioner ka Ri Bhoi, u Akash Marak, ryngkat bad ki ophisar na ki tnat Transport, Pulit bad PWD.
Ha kane ka jingleit jurip, bun tylli ki kali khamtam ki trok kiba la lap ba pynieng khlemakor harud ka National Highway, ki la shah dain kuna katkum ki Kyndon aiñ.
Kum ban shu kdew, ka jingpynieng khlemakor ïa ki kali harud ka surokbah kam dei tang ka daw jong ka jingdheng kali, hynrei ka buh ruh ïa ka jingim jong ki nongleit nongwan ha ka jingma.
Ka jingrit jong ka jaka ban ïaid ki kali ka lah ban wanrah ïa ki jingjia ba sngewsih, kynthup ïa ki aksiden kiba lah ban shim ïa ki jingim briew bad kane ka jingïatreilang hapdeng ka ophis u Deputy Commissioner bad kiwei ki tnat sorkar, ka long ban pynthikna ba ka leit ka wan jong ki paidbah kan long kaba suk bad kaba shngaiñ.
