Haduh 544 tylli ki dieng la pom, 5044 yn thung thymmai biang
Shillong, Nailar 08 : Ka Tnad Touriem ha ka sngi Saitjain kala pyntip ba ka Shillong Ropeway Project kan ym ktah satia ia ki tyllong um lane ka mariang, hadien ka jingiajurip lang ia ka project bad ka tnad PHE, Forest, Shillong Municipal Board lem bad ka Raid Laban Dorbar Pyllun.
Ka Joint Secretary ba khmih ia ka Tnad Tourism, Kong RM Kurbah, kala pyntip ba ia ka jingsngewkhia halor ka um ka dei kaba la dep ban iapynbeit.
“Ka tyllong um ka don shaneng ban leit sha Lawsohtun, kham palat ia ka skul Nepali. Kam don bynta eiei bad ka jaka ba 800 meter tam. Kam don satia ka tyllong um ha shilynter kane ka jaka” kala ong.
Ka kong Kurbah kala pyntip ba ia ka Detailed Project Report (DPR) lah dep ban pynkylla thymmai hadien ki jingpyrshah ia ka jingdon u sainar cable ba jrong kumba 25 meter na khyndew, kaba donkam ia ka jinghap pom ia bun tylli ki dieng.
“Ngi kyrpad ba ia u sainar cable bad ia ka tower ban kham pynjrong shuh shuh. Ngi la don mynta ia ka DPR ba thymmai kaba ka jingjrong kalong 40 meter” kala ong.
Kala pynshai ba ka jingpom ia ki dieng kan long tang ha ki 6tylli ki tower station ba 12×12 meter kawei.
“Ngi la pom tang 544 tylli ki dieng ha ka jaka ban ieng ki tower, baroh ki hap hapoh ka jaka forest. Ngi la thung 5044 tylli ki dieng kum shibynta jong ka jingthung buria ba 1:10 ha ka jaka ka Sorkar” ong ka kong Kurbah.
Halor ka jingktah ia ka mariang, kala pynpaw “Kane ka project kan ym ktah satia la ka long ia ka um ne ka mariang. Ha ka jingshisha, kan nang wanrah shuh shuh ia ka jingitynnad jong kane ka jaka. Ka dei ka project kaba kongsan bha na ka bynta ka Jylla”.
Ka kong Kurbah kala kdew ia ka Sikkim Intra-city ropeway kum ka nuksa bad kyrpad ia ki nongshongshnong ba kin wan sha ka Tnad ban ioh ia ki jingpynshai.
“Ngi kyrpad ia baroh ba kin sngewbha ban sngewthuh ia kane. Lada ka ktah ia phi lane iano iano, wan sha ka Tnad. Ngin ai ia ka jingpynshai” kala ong.
Halor ka jingsngewkhia ia ka jingtwa khyndew, kala bynrap ba ka Tnad Forest kan sa shna bha ia ki padun bad kan sat hung ruh ia ki dieng.
U Khlieh ka KEC-TCL Project J.P. Singh ula pyntip ba ka kompani kala pynthikna ban iaid kat kum ki kyndon iada mariang haba pyntrei ia kane ka project.
