Shillong, Nailar 09: Ki pulit Anti-Narcotics Task Force (ANTF) ryngkat ka jingiatreilang bad ki pulit ka West Jaintia Hills ki la ioh ban kurup ia u drok u ba 48.78 gram uba shongdor kumba T.7 lak ha ka jingkhynra ha West Jaintia Hills.
Halor ka khubor ia ka jingwan ki 2 ngut ki briew na Silchar sha Shillong ryngkat bad u drok, ki pulit ka ANTF bad ki pulit ka West Jaintia Hills ki la pynap shrip (naka) ha shi lynter ka NH-06 ha Phramer.
Ha ka por kumba 8 baje mynstep, ki Pulit kila bat ia kawei ka bus (Network Travels) kaba don ia u number ML-05-T-8381.
Ki 2 ngut kiba la shah kem ki dei kiba la tip kyrteng kum u Robert Nongrum 33 snem ka rta na Umktait Nongmynsong Shillong bad u Batskhemlang Jarain 32 snem ka rta na Umkdait Block-III Shillong.
Ha ka jingtalasi, ki Pulit ki la lap 2 tylli ki synduk buh sabon plastic ba la buhrieh hapoh ka jaket.
Haba la Test la lap ba udei u drok heroin.
Ki ar tylli ki paket ki don ka jingkhia kaba 48.78 gram.
Ka ANTF ka la ong ba ka jingtohkit ka dang ïaid shakhmat ban lap ïa ka tynrai bad ka jaka ba thmu ban pynpoi ïa u drok, kumjuh ruh ïa ka rukom wan kit ia u drok, ka jingiaid lynti ka pisa bad ki jingïadei kiba lah ban don hapdeng ki Jylla ban khaii drok.
Kane ka jingkhynra ka dei shi bynta jong ka jingpynjari iaki aiñ kaba pynshong nongrim ha ka jingwad bniah pyrshah ïa ki kynhun khaii drok ba la pynbeit ryntih kiba treikam hapoh bad lyngba ka Jylla Meghalaya.
Ka ANTF ka la kyrpad ruh ïa ki paidbah ban ïasam ïa ki jingtip halor ka jingkhaii drok bad ong ba kum kane ka jingïatreilang kan kyrshan ïa ki jingpyrshang ban tei ïa ka Meghalaya kaba lait na u drok.
