Guwahati, Nailar 7: Ki pulit ka Assam ki la kem ia lai ngut ki shynrang kiba donkti ha ka jingkynnoh rahbor bad leh beijot da ka kynhun ia ki arngut ki khynnah kynthei kiba dang rit ka rta na Mizoram hapoh kawei ka kali kaba dang iaid ha Cachar district, la iathuh ki pulit.
Kitei kiba la shah kynnoh ki dei kiba la tip kyrteng kum u Amjad Hussain Laskar (20 snem) na Rajnagar, u Saddam Hussain Laskar (23 snem) na Bhaga Bazar bad u Rinku Das (25 snem) na Khaspur bad baroh ki dei kiba hap hapoh jong ka Dholai police station ha Cachar district.
Katkum ki pulit, kitei ki arngut ki khynnah kynthei kiba don ha ka rta kaba 15 bad 16 snem ka rta, ki la poi ha Dholai police station ha ka por 2.30 baje mynstep jong ka 3 tarik Nailar bad ki la pyntip ba ki la shah rahbor bad shah leh beijot.
“Namar ba baroh arngut ki la kam ba ki dei ki khynnah rit, ngi la ïaid shakhmat ïa kane ka kam hapoh ka Juvenile Justice system,” ong uwei u heh ophisar.
Ki pulit ki la ïathuh ba ïa kane ka mukotduma la register hapoh ka kyndon 70(2) (jingleh beijot da kynhun ïa ki kynthei ba dang rit ka rta kaba hapoh 18 snem) bad 87 (shah rahbor) jong ka Bharatiya Nyaya Sanhita (BNS), ryngkat bad ka kyndon 6 jong ka Protection of Children from Sexual Offences (POCSO) Act, kiba ïadei bad ka jingshah leh beijot.
“Ngi dang tohkit ia kane ka kam, bad la buh jingthoh ia ki jingkren jong ki nongshah lehbein kiba dang rit ka rta. Ngi la rah ruh ia ki nongshah kynnoh hakhmat ka iingbishar da kaba bud ia ki rukom treikam ba nyngkong”, la ong une u heh sorkar.
Baroh arngut ki lanot ki la shah eksamin ha ka liang ka koit ka khiah.
Ki pulit ki la iathuh ba kitei ki khynnah kynthei ki dei kiba shong ba sah ha Kolasib district ha Mizoram. Mynta ki nongtohkit ki dang pyrshang ban lap kumno kitei ki khynnah kynthei ki la iakynduh ia ki nongshah kynnoh, nangno ba kila shaw ia ki bad kiwei kiwei ki jingjia kiba don sawdong jong katei ka jingjia.
