Shillong, Nailar 07 : Haduh 7 ngut ki Pulit kila mynsaw bad uwei ula shitom jur na ka jingkulmar kaba mih hapoh ka Dorbar jong ka Hima Langrin ba long ha ka sngi Thohdieng ha shnong Phlangdiloin, South West Khasi Hills.
Ia kane la pyntip da u Superintendent of Police ka District haba iathuh ba ki jingmynsaw kila wan jia na ka jingshah lun maw ha ki paidbhur kiba la pynpra ia ki shuki bad ki jingdon jingem ha kane ka jaka ba pynlong ia ka Dorbar.
U pyntip ba kane ka jingkulmar kala mih hashuwa ban kut artad ka Dorbar kaba la sdang ha ka por 11:30 baje mynstep.
U iathuh ba ha kane ka Dorbar, ki don kumba 1500 ngut ki nongkyrshan u Syiem kila wan iashimbynta ha ka jingialang hynrei katba dang iaid ka jingialang, kila wan tur sa kumba 1500 ngut kiba pyrshah ia u Syiem bad pyrshang ban pynthut ia ka jingialang.
Da ka jingdon ki Pulit bad Magistrate, la lah ban tem ia kine ki briew bad la ailad iaka jingialang ba kan bteng. Hynrei shuwa ban kut ha ka por 12:15 baje eiei, katto katne ngut na kane ka kynhun pyrshah kila pynkulmar da kaba kyrdem ia ki shuki bad kiwei ki jingdon jingem ha katei ka jaka.
U iathuh ba haba ki Pulit bad ki Magistrate kila pyrshang ban tehlakam ia kane bad khanglad ruh ia ka jingpyrshang ban kiew shajrong rynsan, kine ki briew kila sdang sa ka lun maw pyrshah ia ki Pulit.
Khnang ban lah pynpra ia u paidbah, ki Pulit kila hap ban pyndonkam ia ka bor bad hadien kila lah ban pynpra ia u paidbah na kane ka jaka.
Une u Heh Pulit u pyntip ba ia mynta, ka jinglong jingman kala jai jai biang ha katei ka jaka bad la pynbun ruh ia ki bor pahara khnang ban khanglad ia kino kino ki jingjia.
U pyntip ba ki Pulit ki dang ap iaka ejahar na ka Ophis u Syiem ka Hima Langrin ban leh eiei kat kum ka ain halor kane ka jingjia.
