Shillong, Nailar 05 : Ka Meghalaya High Court kala pynksan ia ka hukum set phatok shirta jingim ia u Rain Dhar halor ka jingdonkti ban pyniap ia u Trebor Hinge ha u snem 2015 ha West Jaintia Hills.
Ka Iingkashari ka Chief Justice Revati Mohite Dere bad Justice W Diengdoh kala kyntait ban pdiang ia ka jingkyrpad u Dhar ha ka 4 tarik Nailar, kaba pynskhem ia ka hukum ka Iingkashari District Session bala pynmih ha u Jymmang 2024 kat kum ka Sessions Case No. 76/2015.
Ia u Dhar la pynngat kam bymman hapoh ka kyndon 302 IPC bad ka kuna ba T.5000.
Kane ka case ka dei halor ka jingjia ba 11 tarik Rymphang, 2015 ha kaba u Hinge ula shah thombor bad shah pyniap hajan ka sem sniang hapoh ka shnong.
Ka rai pynsajia kala pynshong nongrim na ka nongai sakhi Nika Thubru, kaba pyntip ia ka Iingkashari ba ka iohi ia u Dhar ba u beh bad dung da ka tari ia u Hinge.
Ia kane la kyrshan ruh da ka kaiphod post mortem u Dr E Challam, kaba batai ia bun tylli ki dak dung kum ka daw jong ka jingiap.
Ka High Court kala ong ba ka jingbatai ka nongai sakhi ha ryngkat ka sakhi medical, kala biang pura ban pynneh ia ka hukum set phatol.
Ka Iingkashari kala bthah ruh ia ka District Legal Services Authority, West Jaintia Hills ban ai jingtip hapoh ka saw taiew halor ka jingai jingiarap song pisa ba T. 3 lak sha ki Kmie Kpa une u lanot.
Ia kane ka mukotduma la buh ban bishar biang ha ka 2 tarik Nailur, 2026 ban ioh ia ka jubab.
