Dawa ka KHNAM ia ka KHADC ban shu khot tender ia ki check gate | Yn iakynduh ia u CEM ha ka taiew ban wan

Shillong, Nailar 05: Ka Khun Hynniewtrep National Awakening Movement (KHNAM) ka la dawa ba ka Khasi Hills Autonomous District Council (KHADC) ka dei ban ai work order ha ka ban pyniaid iaki check gate tang lyngba ki Open Tender ym daka jingkhot thep aplikeshon.

Working President ka KHNAM Bah Thomas Passah u la iathuh ba ka seng ka la pyrshang ban iakynduh ia u CEM ka KHADC Bah Winston Tony Lyngdoh hynrei ula aiktien ban wan iakynduh noh haka sngi Nyngkong.

U Bah Thomas u la ong ba ka KHNAM ka la aiti ia ka Dorkhas ha ka 26 tarik Naitung ha ryngkat bad ki 11 tylli ki Work Order ba la pynmih da ka tnat Trade jong ka KHADC.

U la kynthoh ba ka jingai wai ia ki check gate lyngba ki jingpynbna ha ki kot khubor bad ka jingkhot thep tender, ka dei ka lynti kaba dei katkum ka ain.

“Ngi la ban jur ba ka don ka jingïapher hapdeng ka jingkhot ïa ki Aplikeshon bad ka jingkhot ïa ki Tender. Ha ka ri kaba treikam katkum ka aiñ, ka dei ka rukom ban khot tender. Ngim lah ban pdiang tang ban shu wah ïa ki aplikeshon ha ka Notice Board jong ka KHADC” ong u Bah Thomas.

Da kaba pynshong nongrim na ka RTI, u la ong ba ka Council ka la ai wai mar 8 tylli ki check gate ha u snem 2021-22 bad 2022-23, 3 tylli ha u snem 2024-25, 10 tylli ha u snem 2025-26 bad 11 tylli ha u snem 2026-27.

U la pyrshah ruh ban pynlong ain ia ki khyrdop ” beain” da kaba shu pynmih ia ki work order, bad u la ong ba dei ban ialeh ha kaban pynduna ia ki check gate.

“Kaei kaba ngi kwah ka long ba dei ban pynduna ia ki check gate. Kim dei satia ban don,” u la bynrap.