Shillong, Nailar 03 : Ka Meghalaya High Court kala bthah ia ka Director General of Police ban pynmih ia ka jingbthah kaba shai kaba khang ia ki seng sain pyrthei, ki sengbhalang bad ki kynhun bym don ha ka sorar, ba kin kren sha ki lad pathai khubor hapoh ki Police Station bad ki phatok.
Ka division bench ka Chief Justice Revati Mohite Dere bad Justice W Diengdoh kala pynmih ia ka jing bthah ha ka sngi Nyngkong haba bishar ia ka WP(C) No. 350/2026 bala mudui da ka High Court of Meghalaya Bar Association bad kiwei kiwei.
Ka Iingkashari kala shong bishar ia ka kam ba iadei bad ka jingkynnoh shah shoh u nongiasaid ain da ki dkhot ka seng Hynniewtrep National Youth Front (HNYF).
Haba pyntreikam ia ka hukum ba hashuwa, u Superintendent of Police ka East Khasi Hills Bah Vivek Syiem ula file ia ka affidavit ba 2 tarik Nailar, 2026 bad ula leit mih ruh dalade hakhmat ka Iingkashari.
Kat kum ka affidavit ki Pulit bala pynrung ha ka jingthoh, ia ka ejehar la register ha Sadar Police Station ha ka 31 tarik Naitung kum ka case No. 275(07)/2026 pyrshah ia ki dkhot ka HNYF hapoh ki kyndon bapher bapher ka BNS.
Saw ngut ki briew kila shah kem bad ka jingtohkit mynta kala iaid shakhmat.
Ka affidavit kala air uh hakhmat ka Iingkashari ia ka kaiphod medical examination ba dei bad ka jing shah shoh u nongiasaid ain kaba la leh ha Shillong Civil Hospital.
Ka kaiphod ka pyntip ba une u nongiasaid ain ula don dak mynsaw na ki bynta jong ka ngap ka diang bad ka jingat ka shyntur, jingud ba pang ka khohsiew ka mon bad ka jingdon hapdeng ka jingbym tip briew hapdeng 5 haduh 10 minit.
Haba shimkhia ba ka kynhun kala ai jingkren sha ki lad pathai khubor ha phyllaw ka Police Station, u SP ula pyntip ia ka Iingkashari ba ula pynmih ia ka jingmaham ba khang pyrshah ia kane.
Namar kane ka Iingkashari kala bthah : “Ngi khmih lynti ba ka DGP ka Jylla kan pynmih ruh ia kum kane ka jingbthah lane ka hukum bala don lypa sha baroh ki Police Station, khnang ban pynthikna ba ym dei ban pyndonkam ia ki Police Station/phatok kum ki jaka kren lad pathai khubor da kino kino ki seng sain pyrthei/sengbhalang bad kiwei kiwei….lait na ki Pulit”.
Ka Iingkashari kala bthah ia u Investigating Officer ka Sadar PS Case Nos. 275(07)/2026 bad 265(07)/2026 ba un wna mih beit ha Iingkashari ryngkat ki kot ki sla jong kane ka case ha ka sien bishar ban wan.
Kala pan ruh ia ka affidavit na ka Jylla halor ka jingpyntreikam ia ka jingbthah ka Supreme Court ha ka Tehseen S. Poonawalla case.
Ia kane ka kam la buh ban bishar biang ha ka 19 tarik Nailar, 2026.
