Shillong, Nailar 03 : Ka Meghalaya High Court kala bthah ba dei ban pynlong kongsan ban buh ia ki drop box ha baroh ki Ophis jong ki Bar Association bad ha ka Bar Council ka Meghalaya khnang ba ki nongsaid ain Kynthei bad ki Intern kin lah ban pyntip ia ki jingeh, khamtam ba iadei bad ka jingshah leh kynshlein.
Ia kane ka jingbthah la pynmih da ka division bench ka Chief Justice Revati Mohite Dere bad Justice W Diengdoh haba shong bishar ia ka WP (C) No. 350/2026.
U Sr Adv K Paul, uba mihkhmat ia ki nongmudui, ula pyntip ha Iingkashari ba ka Bar Council ka Meghalaya kala pynlong ia ka jingialang ha ka 31 tarik Jymmang bad kala kut jingmut ban shimkhia ia ka jingshngain bad ka burom jong ki nongsaid ain kynthei bad ki samla pule kynthei ba wan leh intern.
Ula pan por ban file ia ka affidavit ka ban batai bniah ia ki sienjam bala shim.
Haba buh jingthoh ia kane ka jingkular, ka Iingkashari kala ong “Ym donkam ban ong, ba ia mynta bad kumba la kular da u Paul, ia ki drok box dei ban pynlong kongsan ban buh ha baroh ki Ophis ki Bar Association bad ha ka Bar Council ka Meghalaya, kham kloi kat kaba lah bad lada lah ban leh hapoh kane ka taiew, khnang ba yn lah ban leh eiei ia kano kano ka jingujor ba iadei bad ka jingshah leh kynshlein ki nongiasaid ain kynthei bad ki intern”.
Ka Iingkashari kala bthah ruh ia ki nongmudui ban pynlong mamla ia ka Bar Council of Meghalaya bad ka Bar Council of India khnang ba kin lah ban ai ia ki jubab halor ki sienjam ba kila shim ban pynthikna ia ka jingshngain bad ka burom jong ki nongiasaid ain kynthei bad ki intern.
Ia kane ka kam la buh ban bishar biang ha ka 19 tarik Nailar, 2026.
