Nongstoin, Nailar 03 : Ki paidbah na bun tylli ki shnong ka West Khasi Hills, kila iamih paidbah hynne ka sngi Nyngkong ban iashimbynta ha ka rally ban pynrem ia u runar uba pyniap iala u kthaw kurim bad pynmynsaw jur ia ka Kiaw ha ka shnong Porsohsat.
Une u runar u dei u Koldingstar Thongni ba 22 snem, uba la leit thombor ia ka Longiing u Kthaw Bah Elbin Kharbani ba 60 snem bad ka kurim kong Seldaris Kharsyntiew ha ka janmiet 31 tarik Naitung, kaba lam sha ka jingiap u Bah Elbin.
Kane ka jingiaid rally kala sdang na Lailad jong ka shnong Nongsohpian ter ter sha madan shnong Mawrok Porsohsat bad pynkut pat da ka jingialang paidbah.
Ki paidbah kiba la iawan shimbynta ki kynthup naduh ka shnong Pyndenglawar, Nongryntong, Syllei-Ïawkheiñ, Dom kohsam, Nongsohpian, Nongspung, Phot Jaud, Mawrok Porsohsat bad kiwei kiwei.
Ha katei ka jingïalang la ïadonlang u bah Pynroilang Nongsiej sordar shnong Mawrok Porsohsat, Lumlang Kharsyiemlieh President ka HYC WKHD, kong A Kharsyntiew Secretary ka Senglongkmie New Nongstoiñ, bah D. Sun President ka WKSU, bah Moslandar Marngar, bah Eric Kharsyntiew bad kiwei kiwei ki riew pawkhmat ka thaiñ Nongstoiñ bad ïa katei ka jingïalang la pynïaid da u bah Sirian Wahlang sordar shnong Nongsohpian.
