Pyndem ka NIT hakhmat ki jingdawa ka KSU | Lah pynduh ia ka jingsoi Declaration bad pynjynsur ia ka Attendance

Shillong, Nailar 03 : Ka National Institute of Technology (NIT) Meghalaya, kala ai jubab ia ka Khasi Students’ Union (KSU) ba kala pynduh noh ia ka kyndon ba ki samla pule kin hap soi ia ka Undertaking/Declaration haba rung klas bad pynjynsur ruh ia ka jingpoi shong klas (attendance) kumba la dawa ka seng.

Ia kane la pyntip da u samla Alerick Kharjana , Education Secretary ka KSU-Education Cell, kaba la leit leit iakynduh ia ki bor pyniaid ka NIT halor ka jingujor ki samla pule ka NIT ba shah pynbor ban soi ia ka Undertaking/Declaration form kaba khang ban seng ia kino kino ki kynja seng bad ba hap poi shong klas haduh100%.

Ka KSU kala pynpaw ba kine ki kyndon ki dei kibym don nongrim bad kiba pynkhein ia ka jinglaitluid bad ka hok jong ki samla pule ka Institute.

Ka KSU kala pynrem jur ia kane ka jingbuh kyndon bad dawa ba dei ban weng noh mardor hapoh shitaiew ia ka jinghap soi ia ka Undertaking/ Declaration nalor ban pynbeit ia ka polisi ban poi shong klas kat kum ka Academic Regulation.

U samla Alarick u pyntip ba hadien san sngi, ki bor pyniaid ka NIT Meghalaya kila phah ia ka jubab paidbah sha ka seng ba pynshisha ba ka Institute kala rai ban pynkylla ia ka kyndon poi shong klas da kaba pynjynsur na ka 100% sha ka 75%.

Ka Institute kala pyntip ruh ba kan sa pynduh noh ia ka rukom shim Undertaking/Declaration Form naduh ka samoi pule 2026-27.

Nalor kane, u iathuh ba ka NIT kan sa pynkhlain ia ka Student Grievance Redressal Mechanism bad kan wanrah ia ka Online Grienvance Portal ban pynsuk ia ki samla pule ban phah ia ki jingujor jong ki.

“Ka KSU ka sngew ba kane ka dei ka jingjop jong baroh ki samla pule bad ka pyni ba haba ka sur jong ki samla ka mih paidbah bad da ka nongrim kaba dei, lah ban pynkylla ia ki polisi kiba ktah ia ka jingbit jingbiang jong ki” ula ong.

Ka KSU ka ai khublei ruh ia baroh ki samla pule kiba la pynpaw ia ka jingeh jong ki bad buh ka jingshaniah ha ka KSU.