Shillong Naitung 31: U Khlur Aktor ka Bollywood u John Abraham hynne ka sngi Thohdieng, ula ong, ba ka Thain Shatei Lammihngi ka don ia ka kabu kaba biang tam ban pynmih ia ki nongialehkai football kiba tbit ha ka pyrthei bad ula pynbna ba kane ka Football Academy kaba thymmai ha ka thain kan long kaba la pynkhreh ha kine ki 2 snem kiban wan.
Haba kren ha ka jingialang pynsngewthuh paitbah ban pyrshah ia u droks halor ka phang “Pulse of the Hills: Every Beat Against Drugs” kaba la pynlong da ka Sorkar Meghalaya ryngkat ka jingiatreilang bad ka Drug Reduction Elimination & Action Mission (DREAM), u John Abraham ula ong, ba u iohi ia kane ka thain kum ka lawei jong ka Football ha ka ri.
Da kaba ong, ba ka thaiñ shatei lammihngi kadei ka jaka kaba ka football ka pawnam bha, u Abraham ula ong, “Nga kwah ban iohi ia u Ronaldo ne ia u Messi ban mih na ka thaiñ Northeast”.
Ula bynrap ba kane ka Football Academy kaban sa wan kadei shi bynta jongka jingiohi jngai ban saiñdur bad ban ai jinghikai ia ki nongialehkai kiba dang khynnah kiba na kane ka thaiñ.
Haba iakren bad ki khynnah pule ha State Guest House, Taraghar, u Abraham ula kren ia ka jingdonkam ban kiar ia ki jingmlien kiba sniew bad ki jingdih kiba sniew.
Ula ialap ban long kiba don akor bad ban long kiba ryntih, ban im ia ka jingim kaba lait na kino kino ki jingdih kiba sniew kaba don ia ka tynrai jong ka jinglong kaba khlain bad ula kyntu ia ki samla ba kin pyndonkam ia ka bor ka jongki ha ki kam ialehkai.
Ula pynpaw ruh ka jingsngewnguh ia u Myntri Rangbah ka Jylla u Conrad K Sangma, da kaba ong “Ba u long uwei na ki briew kiba bha ” bad kren ruh ia ka jingdon ka jongu ia ka jingieid na ka bynta ka Shillong bad ka Northeast baroh kawei.
Katba u Nongaibuit jong ka Tnad Social Welfare u Bah Paul Lyngdoh, uba la long kum u Kongsan ula kren halor ki jingbei tyngka ia ki kam pynroi kiba dang iaid shakhmat na ka bynta ki samla bad ia ki jingtei ha ki kam ialehkai, kaba kynthup ia ka Academy bad ia ka Stadium kaba ula ong, ba kan dei ka Stadium kaba heh tam ha ka ri kan don ha Shillong.
“Ka thain ka kan ioh ia ka lawei kaba phyrnai khambha ban ia ka sngi” ula ong.
Kane ka prokram kala pynleit jingmut ha kaban kiar, ban ioh ia ka jingkoit jingkhiah bad ka jingdonbynta lang ka imlang sahlang hapoh jong ka DREAM Mission, kaba la sdang ha u snem 2022.
Ha kane ka jingialang, la pyllait paitbah ia kawei ka kali kaban ai jingshakri kyrpang ia ka Asha Bhavan Rehab Centre ha Tura ban pynkhlain ia ka jingpyrshang ka jylla ban pynduna ia u drok bad ban ai jingsumar.
U Abraham ula pynkup burom ia kito kiba la lah ban iehnoh ia ki jingdih kiba sniew bad ban ioh ia ka jingkoit jingkhiah bad ia uba dang khynnah tam ban ioh noh ia ka jingkoit jingkhiah.
Katba ka Saloni Verma ka Director ka Tnad Social Welfare kala ong, ba ka prokram ka long kum ka jingieng tylli ka sorkar pyrshah ia ki jingdih kiba sniew.
Kala pynshlur ia ki samla ban bud ia ki nuksa jong u John Abraham uba la iengskhem ban don ia ka met kaba koit ba khiah bad ban long uba ryntih bad ka bynrap “Ba ka jingjop kaba shisha kadei kaba shong eh ha kaban tei ia ka met bad ia ka bor pyrkhat kaba khlain”.
Ha kane ka jingialang la ioh ruh ia ka jingphla na kito kiba la jop ia ka jingiakhun pyrshah bad kiba la ioh ia ka koit ka khiah bad Youth Icon. U Marvin B. Warjri uba long u Recovery Champion 2026 na ka Meghalaya Users’ Forum, uba la sam ia ka khubor halor ka jingiaid lynti ka jongu ha ka jingim shimet ka jongu ha ka
“The Choice That Changed Everything.”
Katba ka Dapalei Linna Warjri, ka Fitfluencer bad kaba la ioh ia ka khusnam Youth Icon ha u 2024, kala ai jingbatai halor ka “Fit Over Fix,” bad ialap ban tei ia ka met kaba khlain bad kaba koit ba khiah.
Katba u nongrwai u Kitkupar Nongsiej, uba la rung sha ka Final jongka World Championship of Performing Arts 2026, ula pynbyrngia da ka jingrwai “Made for More” bad la pynkut ia kane ka prokram ha kaba ki heh ki hain bad ki nongiashimbynta kila shim ia ka jingbam smai kaba la tip kum ka “The Dream Wall of Commitment” ban tei ka Meghalaya kaba laitluid na u drok.
