Shillong, Naitung 31 : Ka Meghalaya High Court ha ka sngi Palei kala pynpaw ia ka jingsngewkhia halor ka jingdon bun ki kot CCTV ki bym treikam ha ki Police Station ha kylleng ka Jylla bad bthah ia ka Sorkar ban ai ia ka affidavit kaba bniah ia ka jingpyntreikam ia kaei kaba bthah.
Ka division bench ka Chief Justice Revati Mohite Dere bad Justice W Diengdoh kala pynmih ia kane ka jingbthah haba shong bishar ia ka PIL bala mudui da u Bah Kishan K Nongkynrih.
La pyntip ia ka Iingkashari lyngba ka affidavit bala file da u Assistant Inspector General of Police (AIG) Dr SP Marak ba bun ki CCTV camera kim treikam satia.
“Ka jingbym treikam ki CCTV camera ka paw ba ki don bun tylli kum ka nuksa, ha East Garo Hills, Williamnagar kumba 50 tylli ki camera kim treikam bad ha East Khasi Hills, Shillong kumba 129 tylli ki camera kim treikam” ong ka affidavit.
La pyntipruh ba ki camera ha Laban Police Station kila sangeh treikam hadien ka jingpom u pyrthat, katba kiwei pat ki dei namar ka jingsniew tiar.
Ka affidavit ka pyntip ba ka Police Headquarter kala thoh sha ka kompani ba pynpoi ia kine ki camera ha ka 9 tarik Lber, 2026 ba kan wan jurip bad ban maramot ia ki.
Hynrei ka Iingkashari, ka shem ba kam shym la don sati aka jingpynbeit ne ka jingshimkhia bha ia kane ka kam, kaba ka tnad ka tip kham bha”.
Ka Sorkar kala pyntip ruh ia ka Iingkashari ba kala aiti ia ka jingtyrwa hapoh ka ASUMP ba T. 25,24,34,500 ban pynkhlain ia ki kor CCTV kiba la don mynta, ban pyndait shuh shuh ia ki CCTV camera bad ban pynkha ia ka Centralized Dashboard Monitoring System”.
The state also informed the court that a proposal has been submitted under ASUMP for “₹25,24,34,500/- for upgradation of the existing CCTV surveillance system, installation of additional CCTV cameras and establishment of a Centralized Dashboard Monitoring System.” Kane ka jingtyrwa ka dang sahkut hapoh ka Ministry of Home Affairs.
Haba shem ba ka kaiphod kam pat biang pura, ka Iingkashari ka ong “Ngi shem ba ka affidavit kam shym la ai ia ka jingtip kaba dei jong ki CCTV camera kiba treikam. Ngi khmih lynti ia ka jylla ba kan ai ia ka affidavit ba batai bniah….ba mynno la pyndait ia ki kor CCTV bad ha kiei ki police station, katno tylli kiba treikam bad katno tylli ki bym treikam”.
Ka Iingkashari kala shem ba kam shym la don ka jingpyntreikam ia ka hukum jong ka Iingkashari ba hakhlieh duh bala pynmih ha ka mukotduma Paramvir Singh Saini v. Baljit Singh” bad ka hukum u snem 2021 ba bthah ia ki Jylla ban file affidavit halorka jingbhah mang tyngka bad ki sienjam bala shim.
Ka Iingkashari ka bthah ia ka Jylla ba kan ai ia ka jingtip ba bniah halor ka jingbhah mang tyngka, ka jingai contract ban pynbha ia ki kot ba man u snem, bad haduh katno snem la buh ia ki video CCTV. Kat kum ka jingbthah ka Supreme Court, “Ki video CCTB ki dei ban buh ym duna ia ka hynriew bnai”.
Ka Iingkashari kala bthah ban pynlong liang mamla ia ka Sorkar Pdeng, CBI, NIA, ED, NCB bad DRI.
Ia kane ka mukotduma la buh ban shong bishar biang ha ka 20 tarik Nailar, 2026.
