Shillong, Naitung 28 : U Symbud Myntri Rangbah Bah Sniawbhalang Dhar ula ban jur ba ka NPP ka dei ka seng sain pyrthei kaba skhem ha Meghalaya bad kam pat ju pynmih ia kano kano ka jingiaknieh bor ha kine ki 8 snem ba ka bat ia u lakam ka jingsynshar.
Haba kren ha ka rynsan ialap elekshon shiteng samoi ka Shillong Lok Sabha na ka bynta u kyrtong ka NPP Dr DRL Nonglait ha Umdihar, Umsning, Ri-Bhoi, u Bah Sniawbha ula pyniapher ia ka synshar khadar jong ka NPP bad ki Sorkar kiba la leit noh.
“La palat phra snem ngi la synshar ia ka Meghalaya. Ngim ju iashrut ne iaknieh halor ka shuki Myntri Rangbah, ngim ju iaknieh ia ka shuki Symbud Myntri Rangbah, ngim ju iaknieh halor ka kam MP lane President namar ngi bunkam ban iatrei ia ki kam na ka bynta u paidbah ka Jylla” ula ong.
“Kynmaw, ha ka por jong kiwei ki seng sain pyrthei, ki Myntri Rangbah ki bujli man ka 7 bnai. Ba duna eh ka long ha man ka 2 snem. Mynta ngi la ioh ia ka Sorkar kaba skhem bha” ula ong.
U Bah Sniawbha ula ong ba ka kam ba hakhmat eh jong ka NPP ka long ban trei ia ka kam ym ban shu heh tyngam.
“Ka NPP ka dei ka party ka bym don por ban shong bad iathuh khana lorni ha ki iew. Ngi bunkam ban trei, bunsien ban shong miet khnang ban lah pynbiang ia ki jingdonkam u paidbah. Mano na ki nongia lam ka NPP ki don por ban jubab ia ki nia kai?. Ngi jubab haba ngi sngew donkam ban jubab. Ngim dei ban pynlut ia ka por ba jubab ia kito ki bym don eiei ban leh” ula ong.
U Bah Sniawbha ula pynpaw “Ka jingim ka dei kaba lyngkot. Ngim don eiei pyrshah iano iano ruh. Ka kam jong ngi ka long ban ieid iwei ia iwei pat. Ngi don hangne ban pynbeit mar kylliang, ym ban khot ia ki briew ki nongtuh. Lada ngi ki nongialam ngi kren kumta iala ki jong ki briew, shano ka Jylla jong ngi kan poi?”.
U Bah Sniawbha ula batai ia u Dr DRL Nonglait kum u nongialam uba sngewrit bad uba don ka jing shemphang, uba la “im haki shnong nongkyndong bad mad ia ki jingeh” bad un nym klet satia ia ki paidbah lada u shah jied kum u MP.
Ula kyntu ia ki nongthep vote ka Umdihar, Umsning bad ha baroh kawei ka Ri-Bhoi ba kin kyrshan ia u kyrtong ka NPP, da kaba ong ba ka jingiatreilang hapdeng ki nongialam ka Jylla bad ha Delhi ka long kaba kongsan ban wanrah ia ka roi ka par.
“Lada u MP u don ha ka liang pyrshah, ngin sdang da kaba minus. Ngi donkam ia ki briew na kajuh ka Iing, kajuh ka kynhun, ha Jylla bad ka Delhi, kumta ka roi ka par ruh kan wan” ong u Bah Sniawbha.
