Kohima, Naitung 28: Ia ka jingtohkit halor ka jingbthei bom ha Khopanala la aiti noh sha ka National Investigation Agency (NIA), ha kaba ka sorkar kmie ka la kdew ia ka jingktah jong katei ka kam pyntriem ia ka jingshngain jong ka ri.
Ha ka kyrwoh ba la pynmih ha ka sngi Ba-ar, ki pulit ka Nagaland ki la ong ba ka Ministry of Home Affairs (MHA), lyngba ka jingpyntip ba la pynmih ha ka 27 tarik u Naitung, ka la bthah ïa ka NIA ban shimti ïa ka jingtohkit halor ka jingbthei bom ha ka 13 tarik u Naitung, kaba la register nyngkong eh ha Chümoukedima Police Station.
Katkum ka jingong jong ka Ophis jong u Director General of Police Director, ka Sorkar Pdeng ka la pynkut ba kane ka jingjia ka dei kaba ïadei bad ka “jingleh bymman ba la buh por” katkum ka National Investigation Agency Act, 2008 kaba pynlong ïa ka jingtohkit jong ka sorkar pdeng.
Ka MHA ka la pyndonkam ia ka bor jong ka katkum ka kyndon 6(5) ba la pule ryngkat bad ka kyndon 8 jong ka NIA Act ban pynkynriah ia ka jingtohkit, da kaba kdew ia ka jingkhia jong ka kam runar bad ka jingktah jong ka ia ka jingshngain jong ka ri.
Ki pulit ka Nagaland ki la ong ba ka sorkar jylla bad ka tnad pulit kin iatreilang bad ka NIA ban pynsuk ia ka jingpynkynriah ia kane ka case katkum ki kyndon ain.
Ka jingbthei ha Khopanala ha ka 13 tarik u Naitung ka la pynlong ia ki pulit ban tohkit, hynrei haduh mynta ki bor pyniaid kim pat pynpaw bniah ia ka jinglong jong katei ka jingbthei ne ia kiba donkti.
La khmih lynti ia ki jingtip ba bniah ynda ka NIA ka la sdang ia ka jingtohkit jong ka.
, ha kaba ka sorkar kmie ka la kdew ia ka jingktah jong katei ka kam pyntriem ia ka jingshngain jong ka ri.){kind=link}