Guwahati, Naitung 28: Ka sorkar Assam ka la rai ban weng noh ïa ki kam runar bad kiwei kiwei ki jingshah kem pyrshah ïa kito kiba ïakhih halor ka jingkynnoh ba lait tuh ki jingkylli eksamin NEET, kaba la pynkut noh ïa ka jingïakynad.
Ha ka order ba la pynmih ha ka miet jong ka sngi Nyngkong, ki Pulit ka Assam ki la ong ba kin ym leh ei ei kaba sniew pyrshah ïa kito kiba ïashim bynta ha ki jingïakhih ban dawa ban hiar shuki noh ïa u Dharmendra Pradhan, myntri ka tnat pule puthi jong ka sorkar pdeng.Ka la bynrap ba ka jingbishar bniah ïa ki jingshah kem bad ban pynsuk ban pyllait ïa ki 13 ngut kiba la shah kem ha kaba ïadei bad ka jingïakhih ka la sdang “da kaba stet”.
Ïa kine ki nongïakhih la kem ha ka por ba ki don ka jingïakhih ba la pynlong da ka Citizens for Justice and Peace (CJP) hadien ka jingïakynad halor ka jinglait tuh ki jingkylli jong ka eksamin NEET.
Napdeng kiba la shah kem ki kynthup ia u nongiasaid ain u Ariful Islam bad ki nongtrei kiba pynpoi marbam u Chinmoy Deka, u Amir Ali, u Mustahid Ahmed bad u Mehdi Alam ha Guwahati, lai ngut ki samla pule na Lakhimpur district, bad u nongaiktien ka seng Congress u Birinchi Bora ha Nagaon.
Ki lai ngut ki samla pule kiba la shah kem ha Lakhimpur ki dei kiba la tip kyrteng kum u Monjur Rahman, u Ashraful Islam bad u Abdul Kashem.
Kane ka jingshah kem ha Guwahati ka dei hadien ka jingiakhih kaba heh kaba la pynlong da ka seng Students’ Federation of India (SFI).
Ki pulit ki la pynngat kham mynshwa ia ki katto katne ki nongshah kynnoh hapoh ki kyndon jong ka Bharatiya Nyaya Sanhita, kynthup ia ka jingthmu ban leh kam sniew, ka jingialang beain, ka jingpynkulmar, ka jingkhanglad ia ki nongtrei paidbah ban pyndep ia ki kamram jong ki, ka jingshah leh bakla, bad ki kam runar kiba iadei bad ki kam kiba la kynnoh ba ki ktah ia ka jinglong ba janai jong ka ri India.
Ki nongtohkit ki la kam ruh ba ki la lap ïa ki record electronic na ki mobile phone jong ki katto katne ki nongshah kynnoh, kynthup ïa ki khubor WhatsApp kiba kdew sha ki jingthmu ban pynlong ïa ka “jingïakhih kaba long kum ha Nepal”, kaba ki pulit ki la ong ba ki dang eksamin kum shi bynta jong ka jingtohkit.
Hynrei da ka rai ba khatduh jong ka sorkar ban weng noh ia ki mukotduma, ki pulit ki la ong ba ia kane ka kam mynta yn niew kum kaba la khang.
