Shillong, Naitung 27: Arngut ki samla kila khlad ha shen hadien ba kila shah tynrah ha kawei ka kali ka bym lah ban ithuh, ha ka miet jong ka sngi u Blei ha Golflink kaba la pynlong ia ki pulit ban thwet jur ia u nongniah jong katei ka kali.
U SP ka East Khasi Hills u Bah Vivek Syiem ula ong, ba uwei u shynrang uba dang 18 snem ka rta bad kawei ka khynnah kynthei kaba dang 17 snem ka rta kila shong ha ka thuk thuk (Scooty) ha ka por ba kila shah tynrah.
“Ia kine la pynkit mardor sha Civil Hospital hynrei la pynbna ba ba kila lah dep ban khlad noh shwa ban poi sha hospital. Iwei dei na ka shnong Mawpun katba iwei pat dei na ka shnong Pynthor” ong u Bah Syiem haba iakren bad ki nongthoh khubor hynne ka sngi Nyngkong.
U shynrang uba la khlad noh la tip kyrteng kum u Benjamin Shabong 18 snem ka rta bad ka kynthei pat kadei kaba la tip kum ka Fabela Grace 17 snem ka rta.
Ki pulit kila ong, ba kila leit ban shimkhia mardor tang hadien jong ka 5 minit ba kila ioh jingtip.
“Nga lah ioh nyngkong ia ka jingtip bad nga la pyntip mardor sha ki pulit jongka
Pasteur bad Sardar Traffic. Ki lah poi ha katei ka jaka hapoh jong ka 5 minit” ong u SP.
Ki pulit kila rejistar case ia kane ka jingjia bad ka jingpyrshang ka dang iaid shakhmat ban lap ia katei ka kali.
“Ngi dang trei ia ka kam ban ithuh ia katei ka kali kaba la donkti. Shisien ba ngi lah dep ban ithuh, ngin sa kem ia u nongniah” ong u Bah Syiem.
Ki nongtohkit kin sa khmih ruh ia ka kaiphod kaba ioh na ka jingleh ia ka post-mortem ban peit ia ki bynta jong ka jingdih kyiad bad ka jinghusiar ha ka por ba kala mih katei ka jingjia tynrah kali. Ki pulit traffic kin pynlong ia ka jingtohkit ha kiba bun ki liang ban pynthikna ban pynsajia ia uba donkti.
“Na ka ejahar, kala pawshai ba u nongniah u lah dei ban sangeh bad ban aiti noh ialade. Hynrei namar ba ula phet krad, ka paw ba ula leh bakla ha ka liang ka jongu. Ngi lah rejistar ia ka case pyrshah ia u nongniah bad ia katei ka kali. Ngin buddien haduh ban da lap” ula bynrap.
